“Beynəlxalq Şəffaflıq – Gürcüstan “: Gürcü Arzusu” 2025-ci ilin ilk yarısında partiya ianələrinin 87%-ni əldə edib

Qeyri-hökumət təşkilatı “Beynəlxalq Şəffaflıq –Gürcüstan” 2025-ci ilin ilk 6 ayı üzrə siyasi ianələrlə bağlı hesabat yayıb.

InterPress.ge xəbər verir ki, hesabata əsasən, “Gürcü Arzusu” 6,6 milyon lari məbləğində ianə alıb ki, bu da bütün siyasi partiyaların əldə etdiyi ümumi ianələrin 87%-ni təşkil edir.

Təşkilatən məlumatına görə, hakim partiyanın aldığı ianələr digər bütün partiyaların birlikdə topladığı məbləğdən 6 dəfə çoxdur – onların ümumi ianəsi cəmi 1 019 578 laridir. Bu fakt təşkilatın qiymətləndirməsinə görə, siyasi maliyyələşmədə ciddi qeyri-bərabərliyə işarədir.

Hesabatda vurğulanır ki, hakim partiyanın iri donorları ilə əlaqəli şirkətlər milyonlarla dəyərində dövlət tenderləri və subsidiyalar əldə edir, bu isə sistemli korrupsiya şübhələrini artırır:

2024-cü ildən etibarən, partiya donorları ilə əlaqəli 11 şirkət dövlət tenderlərində 143,6 milyon lari dəyərində müqavilələr qazanıb. 2016-cı ildən bu rəqəm 422 milyon lariyə çatır.

Eyni dövrdə bu donorlarla əlaqəli 23 şirkət sadələşdirilmiş satınalma müqavilələri əsasında 1,5 milyon lariyə yaxın vəsait alıb. 2016-cı ildən bu rəqəm 15 milyon laridən çoxdur.

Müqayisə üçün, oppozisiya partiyalarının donorları ilə əlaqəli heç bir şirkət tender qazanmayıb, sadələşdirilmiş satınalma müqavilələrinin ümumi dəyəri isə cəmi 185 447 lari təşkil edib.

Kənd təsərrüfatı subsidiyalarına gəlincə, 2024-cü ildən:

13 donorla əlaqəli şirkətə 27 milyon laridən çox subsidiya verilib, ümumilikdə isə bu şirkətlər 71 milyon lariyə yaxın kənd təsərrüfatı subsidiyası alıblar.

Xüsusilə Vaxdanq Kariçiaşvilinin biznes şəbəkəsi ön plana çıxır – bu strukturun şirkətləri təkcə 2024-cü ildə 25 milyon lari subsidiya alıb ki, bu da həmin il verilən ümumi aqro subsidiyaların 13%-nə bərabərdir.

Bu dövrdə oppozisiya donorları ilə əlaqəli heç bir şirkət aqrosubsidiya almayıb.

Təşkilat həmçinin bildirir ki, Acarıstan Ali Şurasının sədri Tornike Rijkvadzenin istefasından sonrakı üç ayda partiyaya 2,5 milyon laridən çox ianə Acarıstandan daxil olub. Bu qədər böyük məbləğdə bölgə ianəsi misli görünməmiş haldır və ehtimal edilir ki, bu vəsait üçüncü şəxslər vasitəsilə köçürülüb – bu isə qanun pozuntusu deməkdir.

2025-ci ilin ilk yarısında “Gürcü Arzusu”na 168 nəfər ümumilikdə 6 573 370 lari bağışlayıb. Hesabat dövründə bu donorların ümumi ianəsi artıq 20 milyon larini keçib.