Papuaşvili: İmmunitet ilahi zireh deyil – parlament sadə səs çoxluğu ilə ləğv edə bilər

"Deputat toxunulmazlığı heç bir müqəddəs və toxunulmaz status deyil və parlament onu adi səs çoxluğu ilə ləğv edə bilər."

InterPress.ge xəbər verir ki, bu barədə Parlamentin sədri Şalva Papuaşvili jurnalistlərlə söhbətində eks-premyer Giorgi Qaxarianın parlament mandatının və toxunulmazlığının dayandırılması məsələsinə toxunaraq bildirib.

“İmmunitet elə bir ilahi zireh deyil ki, onu heç kim toxunulmaz saysın. Parlament sadə çoxluqla onu ləğv edə bilər. Buna görə də bu məsələdə heç bir problem yoxdur və heç vaxt da olmayıb. Əgər parlament üzvü cinayət törədibsə və prokurorluğun lazımi sübutları və rəsmi müraciəti varsa, toxunulmazlıq əvvəllər də qaldırılıb. Məsələn, Giorgi Qaxarianın israrı ilə biz Nika Meliyanın toxunulmazlığını ləğv etdik. İmmunitet heç vaxt cinayətkarları qorumaq üçün nəzərdə tutulmayıb.”

Papuaşvili Qaxaria və onun partiyasının üzvlərini seçicilərinə xəyanət etməkdə ittiham edərək əlavə edib ki, onların parlamentdə iştirakdan faktiki imtinası mandatların itirilməsi ilə nəticələnəcək:

“Bu mandatları onlar özləri ləğv etdilər. Parlament də bununla bağlı qərar verəcək. Xalq tərəfindən seçilmiş şəxslər, 2024-cü il seçkilərində onlara etimad göstərildiyi halda, seçicilərini aldadaraq uzun müddətdir faktiki olaraq ‘şatalo’dadırlar. Təbii ki, belə halda mandatlarını itirəcəklər.”

Parlamentin sədri Giorgi Qaxarianın istintaq komissiyasından yayınması və ölkəni qəfil tərk etməsini də tənqid atəşinə tutub:

“Onun partiya yoldaşları da indi cavab verə bilmir ki, o nə vaxt qayıdacaq. İlk dəfədir belə şey eşidirəm – guya planlı səfərə gedir, amma yalnız tək istiqamətə bilet alıb, qayıtmağa bileti yoxdur. Bu absurddur. Faktiki olaraq bir göz qırpımında yoxa çıxdı. Onu cəsur və prinsipial lider kimi təqdim etməyə çalışırdılar, amma nəticədə gördük ki, o, çətinliklər qarşısında qaçan adamdır. 2021-ci ildə necə “Gürcü Arzusu”ndan qaçdısa, indi də öz partiyasından qaçdı. Halbuki istintaq komissiyasında adi iş şəraiti var idi. Bilmirəm nədən qorxdu ki, yenidən ora gəlmədi və izahat vermədi. Halbuki komissiya ona onlayn qoşulmağa da icazə verdi və sabah onu bu formatda dinləyəcəyik,” – deyə Papuaşvili vurğulayıb.