Mamuka Xazaradze: “Bu gün məhkəmə prosesimizdir – Bidzinanın bizi həbs etdirməyə can atdığı beşinci ildir”

“Bu gün məhkəmə prosesimizdir – Bidzinanın bizi həbs etdirməyə can atdığı beşinci ildir.”

InterPress.ge xəbər verir ki, bu barədə “Lelo – Güclü Gürcüstan üçün” partiyasının lideri Mamuka Xazaradze sosial şəbəkə üzərindən bu gün keçiriləcək məhkəmə prosesi ilə bağlı yaydığı bəyanatda qeyd edib.

O bildirib ki, artıq beş ildir onun və partiya üzvü Badri Caparidzenin siyasi təqibinə davam edilir və hökumət onların həbsinə çalışır.

“Bu gün 20 iyundur – altı il əvvəl Gürcü Arzusu rus deputat Qavrilova parlamentin sədr kreslosunu təhvil verdi. Elə həmin gün ölkənin azadlığı və müstəqilliyi uğrunda ictimai hərəkatın yaradılacağını elan etdim. O vaxtdan bəri ‘Gürcü Arzusu’ 2020, 2021 və 2024-cü il seçkilərində hakimiyyəti qəsb etdi, Anakliya limanının layihəsini pozdu, ABŞ-la strateji tərəfdaşlığı dayandırdı, Konstitusiyanın 78-ci maddəsini və Avropa İttifaqına inteqrasiya istiqamətini rədd etdi,” – deyə Xazaradze qeyd edib.

O, Bidzina İvanişviliyə ünvanladığı çıxışında bildirib ki, hansı qərar çıxarılmasından asılı olmayaraq, onun “xain siyasətinə qarşı mübarizə” davam edəcək:

“Sənin itaətkar hakimlərindən hansı qərarı çıxartdırsan da, bu mübarizə – xain siyasətinə qarşı – davam edəcək. Gürcüstanın deokkupasiyası və azad gələcəyi naminə mübarizəmizi azad və ləyaqətli xalqla birlikdə aparacağıq.”

Mamuka Xazaradze həmçinin bildirib ki, dünən o, guya vətənə xəyanətlə bağlı fəaliyyətlərin araşdırılması məqsədilə yaradılmış parlament komissiyasına ifadə verməyə çağırılıb:

“Ölkənin 80 faizini demək olar ki, Rusiyaya təslim etmiş bir siyasi qrup indi məni vətənə xəyanətdə ittiham edir. Bu, riyakarlığın və məsuliyyətsizliyin ən yüksək həddidir.”

Xazaradze sonda bildirib ki, ölkədə başqa bir perspektiv və gələcək mövcuddur və bu gələcək uğrunda mübarizə sonadək davam edəcək.