Gigi Ugulava və daha 7 nəfərin işi üzrə ilkin məhkəmə prosesi keçirilir

Tbilisi Şəhər Məhkəməsində “Tbilisi Mall” yaxınlığında strateji əhəmiyyətli obyektin qrup halında bloklanmasına cəhd göstərilməsi ilə bağlı Gigi Ugulava və daha 7 nəfərin işi üzrə ilkin məhkəmə iclası keçirilir.

InterPress.ge xəbər verir ki, bu günkü iclasda Gigi Ugulava, Vasil Eliava, İrakli Tabatadze, İrakli Tsıgnadze, Dimitri Bidzinaşvili, Nikoloz Kupatadze, Nikoloz Qumsişvili və Aleksandre Qoqoladzeyə qarşı irəli sürülən ittiham üzrə sübutların məhkəməyə təqdim olunmasının qanuniliyinə baxılır.

Məhkəmə iclasından öncə müxalifətçi siyasətçi Gigi Ugulava verdiyi açıqlamada ölkədə baş verənləri siyasi təqib kimi qiymətləndirib:

“Cəmiyyət bu hüquqi absurdları xatırlayır, elə ki, sonda istintaq həbsinin dəyişdirilməsinə məcbur oldular. Bu, əlbəttə, siyasi təqibdir. Bu gün daha ağır hadisələr baş verir – həbslərin elan edilmiş xronikasını müşahidə edirik”.

Ugulavanın sözlərinə görə, “bütün bu məhkəmə prosesləri qeyri-qanunidir – bu məhkəmə deyil, bu, əmrə tabe olan bir canavarlar korporasiyasıdır”.

Bugünkü iclasda həmçinin, işin mahiyyəti üzrə baxılmağa verilib-verilməyəcəyi qərara alınacaq.

Xatırladaq ki, təqsirləndirilən şəxslərə Gürcüstan Cinayət Məcəlləsinin 19-222-ci maddəsi ilə ittiham irəli sürülüb ki, bu da strateji və ya xüsusi əhəmiyyətli obyektin qrup halında bloklanmasına cəhd göstərilməsini nəzərdə tutur.

Fevralın 2-də “Tbilisi Mall” qarşısında keçirilən etiraz aksiyası zamanı hüquq-mühafizə orqanları ümumilikdə 31 nəfəri inzibati qaydada saxlayıb, lakin fevralın 4-də onlardan 8-nə, o cümlədən Gigi Ugulavaya qarşı cinayət işi açılıb.

İrəli sürülən ittiham 2 ildən 4 ilədək azadlıqdan məhrumetməni nəzərdə tutur.