İrakli Kobaxidze: “MEGOBARI Aktı’ Gürcü xalqının etimadını azaldır – Bayden administrasiyasının qərarları hələ də qüvvədədir”

Gürcüstanın Baş naziri İrakli Kobaxidze ABŞ-ın sabiq prezidenti Donald Trampa və vitse-prezident Cey Di Vensə ünvanladığı açıq məktubda ABŞ administrasiyası tərəfindən Gürcüstan rəsmilərinə qarşı tətbiq olunmuş sanksiyaları tənqid edib.

InterPress.ge xəbər verir ki, Kobaxidzenin sözlərinə görə, bu günədək Gürcüstanın baş nazir müavini və digər dövlət rəsmilərinə qarşı “tamamilə əsassız sanksiyalar” qüvvədə qalır.

O qeyd edir ki, həmin şəxslər məhz Bayden administrasiyasının USAID vasitəsilə maliyyələşdirdiyi “inqilab cəhdi və zorakılığı” effektiv şəkildə önləyiblər.

Baş nazir, həmçinin, ABŞ Konqresi tərəfindən qəbul edilmiş və MEGOBARI aktı kimi tanınan qanun layihəsini sərt şəkildə tənqid edib və onu gürcü xalqına qarşı “düşmənçiliklə yüklənmiş sənəd” adlandırıb:

“MEGOBARI aktı – dostluq adı altında təqdim olunur, lakin bu sənəd Corc Oruelin modeli ilə səsləşir: müharibə – sülh, düşmən isə – dostdur. Bu qanun təkcə Konqresə deyil, həm də sizin administrasiyanıza olan etimadı azaldır – halbuki gürcü cəmiyyəti sizdən fərqli bir ümid gözləyirdi”.

Kobaxidze onu da qeyd edib ki, bu qanuna qarşı Tramp administrasiyasının nümayəndələri hələ də açıq tənqidi münasibət bildirməyiblər və bu, cəmiyyətdə çaşqınlıq yaradıb:

“Son hadisələr cəmiyyətimizdə belə bir təsəvvür formalaşdırır ki, ‘deep state’ə qarşı mübarizə ilə bağlı bəyanatlar əslində yalnız rebrendinq cəhdidir. İctimaiyyət üçün təəccüblüdür ki, siz Baydenin qərarlarını sərt şəkildə tənqid edirsiniz, amma onun cinayət xarakterli qərarlarını bu günə qədər ləğv etməmisiniz”.

Baş nazir sonda vurğulayıb ki, bu qeyri-müəyyənliklərə baxmayaraq, Gürcüstan hökuməti ABŞ-la strateji tərəfdaşlığın bərpasına ümid etməyə davam edir.