Almaniya səfiri: Gürcüstan Avropanın bir hissəsidir və Aİ-yə qoşulmalıdır

“Bütün gürcü dostlarımı Avropa Günü münasibətilə təbrik edirəm. Biz inanırıq ki, Gürcüstan Avropanın bir hissəsidir və o, Avropa İttifaqına qoşulmalıdır.”

InterPress.ge xəbər verir ki, bu barədə Almaniyanın Gürcüstandakı səfiri Peter Fișer bəyan edib.

Səfir qeyd edib ki, üzvlük üçün nəyin lazım olduğunu hamı bilir: “Avropa dostluq və həmrəylikdir və biz bunu bu gün qeyd etmək istəyirik. Ümid edirəm, gələcəkdə gərəkən addımlar atılacaq və biz bir yerdə, bir birlikdə olacağıq.”

O, Gürcüstanın niyə dünən Varşavada keçirilmiş Aİ xarici işlər nazirlərinin qeyri-rəsmi görüşünə dəvət edilmədiyi barədə suala belə cavab verib: “Çünki ötən ilin iyununda Aİ qərar verdi ki, Gürcüstan hökuməti ilə yüksək səviyyəli kontaktları mövcud böhran həll olunana qədər dayandırsın.”

Fișer ümid etdiyini bildirib ki, Gürcüstan düzgün yola qayıdacaq: “Ümid edirəm ki, Gürcüstan, bütün vətəndaşları ilə birlikdə, düzgün yola qayıdacaq. Bu, Gürcüstandan asılıdır. Gürcüstan nədir? Gürcüstan – gürcü xalqıdır. Aİ-yə qoşularkən yalnız hökumət deyil, yalnız parlament və ya biznes sektoru deyil, hamı üzv olur. Ona görə də, üzvlük üçün geniş milli səylər tələb olunur. Biz sizə namizəd statusu təqdim etdik – edə biləcəyimiz ən yaxşı şey budur,” – deyə səfir vurğulayıb.