Gürcüstan Xarici İşlər Nazirliyi Suxumi hava limanının Rusiya tərəfindən qanunsuz istismarı ilə bağlı bəyanat yayıb
Gürcüstan Xarici İşlər Nazirliyi Rusiyanın Suxumi hava limanını qanunsuz istismarından və işğal olunmuş Abxaziya regionunda hava hərəkətinin bərpasından narahatlığını bildirir.
InterPress.ge xəbər verir ki, bu barədə Gürcüstan Xarici İşlər Nazirliyinin yaydığı bəyanatda deyilir.
Qeyd olunur ki, Rusiya aviaşirkətinin 2025-ci il mayın 1-də işğal olunmuş Abxaziya bölgəsinə qeyri-qanuni uçuş həyata keçirməsi, Suxumi hava limanının Rusiyaya verilməsi və istismarı haqqında razılıq Gürcüstanın suverenliyi və ərazi bütövlüyünün, Gürcüstanın işğal olunmuş ərazilər haqqında qanununun, beynəlxalq hüququn fundamental prinsip və normalarının, o cümlədən Gürcüstan və Rusiya Federasiyasının üzv olduğu BMT Nizamnaməsi və Beynəlxalq Mülki Aviasiya Təşkilatının (ICAO) Konvensiyasının kobud şəkildə pozulmasıdır.
“Mayın 1-də Rusiyadan işğal olunmuş Abxaziyaya dəmir yolu hərəkətinin həyata keçirilməsi də narahatlıq doğurur.
Xarici İşlər Nazirliyi müvafiq beynəlxalq mexanizmləri işə salmaqda davam edir və Rusiyanın Gürcüstanın suverenliyini və ərazi bütövlüyünü pozmağa yönəlmiş hərəkətlərini düzgün qiymətləndirmək və lazımi cavab vermək üçün beynəlxalq ictimaiyyətə müraciət edir.
Gürcüstan Xarici İşlər Nazirliyi Rusiya Federasiyasını beynəlxalq öhdəliklərini, o cümlədən Beynəlxalq Mülki Aviasiya Təşkilatı Konvensiyasını və Avropa İttifaqının vasitəçiliyi ilə 2008-ci il 12 avqust tarixli atəşkəs sazişini yerinə yetirməyə çağırır”, - bəyanatda deyilir.
