ABŞ Konqresmeni ATƏT-i Gürcüstana planlaşdırılan səfəri təxirə salmağa çağırıb

ABŞ-ın Helsinki Komissiyasının həmsədri, Respublikaçı Konqres üzvü Co Uilson ATƏT-in baş katibi Feridun Siniroğluna müraciət edərək, təşkilatın gələn həftə Gürcüstana planlaşdırılan səfərini təxirə salmağı tövsiyə edib.

InterPress.ge xəbər verir ki, bu barədə Uilson məktubunda bildirib.

Konqresmen Uilson qeyd edir ki, “Gürcü Arzusu” hökumətinin son addımları və müxalifətə qarşı təzyiqlər ATƏT-in səfərinin legitimlik verdiyi təəssüratını yarada bilər.

Onun sözlərinə görə, ötən ilin oktyabrında ATƏT müşahidə missiyasının verdiyi mənfi qiymətləndirmələr bu hökumətin demokratik legitimliyini şübhə altına alır.

Uilson həmçinin vurğulayıb ki:

 

• “Gürcü Arzusu” hökuməti sülh etirazçılarına qarşı zorakı kampaniya aparır;
• Aktivistlər və müxalifət üzvləri həbs olunub;
• Son qanun dəyişikliyi ilə xarici donorların, o cümlədən ATƏT kimi qurumların, qrantları hökumətin təsdiqindən keçirməsi tələb olunur, bu isə vətəndaş cəmiyyətini və siyasi fəaliyyətləri məhdudlaşdırır.

Konqresmen xəbərdarlıq edir ki, səfər baş tutarsa, bu, “Gürcü Arzusu” hökuməti tərəfindən onların siyasətinə dəstək kimi təqdim ediləcək və təşkilatın legitimlik aləti kimi istifadə olunacaq.

“Zəhmət olmasa, Gürcüstana səfərinizi təxirə salın – vəziyyət yaxşılaşmayana qədər,” – deyə Co Uilson məktubunda bildirib.