Kaxa Kaladze: Giorgi Qaxariyanın komissiya qarşısında çıxışı zamanı çaşqınlıq və ziddiyyətli açıqlamaları açıq şəkildə hiss olunurdu

 

"20 iyun gecəsi baş verənləri analiz etsək, çoxsaylı suallar ortaya çıxır”.

InterPress.ge xəbər verir ki, bunu “Gürcü Arzusu” partiyasının baş katibi, Tbilisi meri Kaxa Kaladze jurnalistlərə açıqlamasında bildirib.

Onun sözlərinə görə, keçmiş daxili işlər naziri, “Gaxariya Gürcüstan üçün” partiyasının lideri Giorgi Qaxariya parlamentin müvəqqəti istintaq komissiyasında çıxış edərkən çaşqın görünürdü və bir-birinə zidd cavablar verirdi.

“20 iyun gecəsi xüsusi təyinatlıların fəaliyyəti ilə bağlı çoxlu suallar yaranır. Biz sonradan bir çox aksiya və xüsusi təyinatlıların müxtəlif cür fəaliyyətini gördük. Fərqli yanaşmalar, fərqli iş üslubu müşahidə edildi və bu da 20 iyun gecəsi ilə bağlı ciddi suallar doğurur. Xüsusi təyinatlıların necə hərəkət etdiyi və necə yerləşdirildiyi ilə bağlı məsələlər xüsusilə diqqət çəkir. Ortaya çıxan faktlar hər şeyi açıq göstərir.

Komissiyada Qaxariyanın çıxışına gəlincə, onun tərəddüd etdiyi və ziddiyyətli açıqlamalar verdiyi aydın hiss olunurdu. Əvvəlki müsahibələri ilə bu çıxışı arasında ciddi ziddiyyətlər var idi və bu da daha çox sual yaratdı”, – deyə Kaladze vurğulayıb.