Şalva Papuaşvili: Yeni ABŞ administrasiyasından gözlədiyimiz tək şey – düzgün nəticələr çıxarmaqdır
“Yeni ABŞ administrasiyasından biz yalnız bir şeyi gözləyirik – bu münasibətləri nəyin pozduğunu düzgün dərk etmək. Hər şey aydındır, izahata da, şərhə də ehtiyac yoxdur."
InterPress.ge xəbər verir ki, bu barədə parlament sədri Şalva Papuaşvili bildirib.
Onun sözlərinə görə, Gürcüstan hökuməti ABŞ-la münasibətləri yeni səhifədən başlamağa hazırdır.
“Əvvəlki administrasiya barədə həmişə deyirdim ki, münasibətləri bərpa etmək üçün onun öz səhvlərini etiraf etməsi vacib idi. Mən bunu təkcə ABŞ administrasiyasına deyil, başqalarına da demişəm – Gürcü xalqından illərlə üzr istəməli idilər, çünki bəzi təşkilatlar bu xalqı parçalamağa və demokratiyanın təməlini dağıtmağa çalışdı. Bizim əvvəlki administrasiyaya yönəltdiyimiz tənqidi indiki administrasiya təsdiqlədi – o qədər təsdiqlədi ki, əvvəlki prezidenti, dövlət katibini və digər yüksək vəzifəli şəxsləri sanksiyalara məruz qoydu və onlara keçmiş vəzifəlilərin malik olduğu məlumatlara çıxışı dayandırdı. Sanksiya tətbiq etdi – Bayden, Blinken və digər sabiq yüksəkçinlilərə qarşı. Yeni administrasiyadan isə biz yalnız düzgün nəticə çıxarmağı gözləyirik. Hər şey ortadadır, heç bir izahata ehtiyac yoxdur. Yeni administrasiya özü təsdiq edib ki, bəzi təşkilatlar Amerika xalqının pulları ilə Gürcüstana qarşı nə edirdi. Sadəcə, düzgün nəticə çıxarmaq qalır.”
Papuaşvili qeyd edib ki, ABŞ prezidentinin tariflərlə bağlı qərarını və böyük ölkələrin reaksiyalarını dinləyiblər:
“Bu ölkələrin çoxunun müqavimət imkanının olmadığını gördük. Biz isə öz siyasi çəkimizə və ölçümüzə görə bu münasibətlərin yenilənməsinə böyük təsir edə bilmərik. Biz sadəcə bəyan edirik ki, münasibətləri yeni səhifədən başlamağa və real, bərabərhüquqlu, qarşılıqlı suverenliyə hörmətə əsaslanan strateji münasibətlər qurmağa hazırıq – əvvəlki administrasiyanın Gürcüstana baxdığı kimi yox, yəni aşağı səviyyəli bir ölkə kimi. Təəssüf ki, bəzi ölkələr hələ də bizə belə baxırlar. Gözləyirik ki, keçmişdən düzgün nəticələr çıxarılacaq – bu münasibətləri nə pozdu?”
Parlament sədri əlavə edib ki, yeni qəbul olunmuş qanunlarla bağlı xarici tərəfdaşların rəyləri anlaşılmazdır, çünki bu qanunlar hələ ingilis dilinə tərcümə olunmayıb:
“Brüsseldən və digər qurumlardan gələn bəyanatlar maraqlıdır. Son günlər bir neçə səfirlik soruşub ki, bu qanunların ingilis dilində variantı varmı. Yoxdur. O zaman bu qanunlar barədə hansı əsasla nəticə çıxarırlar? Görünür, heç oxumayıblar, amma nəticə çıxarırlar. Təəssüf ki, bu cür tələsik və qeyri-peşəkar fikirlər eşidirik. Bizdə hələ tərcümə yoxdur. O halda görəsən, hansı dildə oxuyublar, Brüsseldə və başqa yerlərdə bu nəticələr haradan çıxır? Görünür, yenə də birbaşa dezinformasiya və təbliğatla məşğul olan QHT-lərin bəyanatlarına əsaslanırlar,” – deyə Papuaşvili vurğulayıb.
