İstanbulda etiraz aksiyalarında daha 43 nəfər saxlanılıb
Türkiyə polisi İstanbulda keçirilən etiraz aksiyalarında iştirak edən daha 43 nəfəri saxlayıb.
InterPress.ge xəbər verir ki, bu barədə Türkiyənin daxili işlər naziri Ali Yerlikaya sosial şəbəkə platforması X vasitəsilə məlumat verib.
“Polisimiz 43 təxribatçını saxlayıb. Digər şübhəlilərin həbs olunması üçün işlər davam edir”, – deyə nazir bildirib.
Xatırladaq ki, ötən həftənin çərşənbə günü Türkiyə prezidenti Rəcəb Tayyib Ərdoğanın əsas siyasi rəqibi, İstanbul meri Əkrəm İmamoğlunun həbsi ölkədə son on ildən çox müddət ərzində ən genişmiqyaslı küçə etirazlarına səbəb olub. Etirazlar daha da gücləndi, çünki məhkəmə ona korrupsiya ittihamı ilə ilkin həbs qərarı çıxardı. İmamoğlu isə bu ittihamları rədd edərək, həbsinin siyasi motivli olduğunu bildirir.
Türkiyənin daxili işlər naziri Ali Yerlikaya dünən açıqlama verərək, etiraz aksiyalarının başladığı gündən bəri ümumilikdə 1 133 nəfərin saxlanıldığını bildirib.
