Şalva Papuaşvili: “Oktyabrda müxalifət seçkilərə qatılacaq, bu, gün kimi aydındır”

Gürcüstan parlamentinin sədri Şalva Papuaşvili, oktyabr ayında keçiriləcək yerli idarəetmə seçkiləri ilə bağlı jurnalistlərə açıqlama verib.

InterPress.gr xəbər verir ki, onun sözlərinə görə, ekstremist siyasi qüvvələrin seçkilərə qatılmaması ölkədə tam demokratik yenilənməyə yol açar və Gürcüstan siyasətini radikal qüvvələrdən azad edər.

“Oktyabr ayı gələndə müxalifət seçkilərdə iştirak edəcək, bu, gün kimi aydındır. Amma daha yaxşı olardı ki, ekstremist partiyalar seçkilərə qatılmasınlar. Bu, Gürcüstan demokratiyasına tam yenilənmə imkanı verər və ekstremist siyasi qruplar siyasətdən uzaqlaşdırılar. Onlar artıq bir ilk addım atdılar – mandatlarından imtina etdilər və biz bunu qəbul etdik. Bununla da parlament əsasən xaricdən idarə olunan radikal və ekstremist siyasi qruplardan təmizləndi. Parlamentdə yalnız Gaxariya fraksiyasının marjinal qrupu qalıb və ümid edirəm ki, onlar da gedəcəklər”, – deyə Papuaşvili bildirib.

Parlament sədri əlavə edib ki, müxalifət bəyanatlarına baxmayaraq, seçkilərdə iştirak edəcək. Onun sözlərinə görə, ekstremist qrupların siyasətdən uzaqlaşması Gürcüstanın siyasi mühitində köklü dəyişikliklərə səbəb olacaq.

“Əgər digər radikal qruplar da seçkilərdə iştirak etməsələr, bu, müsbət bir hal olacaq. Çünki bizim siyasi mənzərəmiz ekstremist, radikal və milli maraqlara xəyanət edən qruplardan təmizlənməyə ehtiyac duyur”, – deyə Papuaşvili vurğulayıb.