Rusiya XİN: "Zelenskinin Vaşinqton səfəri tam siyasi və diplomatik uğursuzluqdur"

Rusiya Xarici İşlər Nazirliyinin (XİN) sözçüsü Mariya Zaxarova, Ukrayna prezidenti Volodimir Zelenskinin Vaşinqton səfərini tam siyasi və diplomatik iflas adlandırıb.

InterPress.ge xəbər verir ki,  o, bu barədə mətbuata açıqlamasında bildirib. 

"28 fevralda neonasist rejimin lideri V. Zelenskinin Vaşinqton səfəri Kiyev rejimi üçün tam siyasi və diplomatik uğursuzluqdur. Rusiya tərəfi dəfələrlə Zelenskinin qeyri-adekvat, korrupsiyaya bulaşmış və etibarsız bir şəxs olduğunu bəyan edib", – deyə Zaxarova bildirib.

O, həmçinin iddia edib ki, Zelenski müharibəni davam etdirmək niyyətindədir və sülhü qəbul etmir.

"Mövcud siyasi şərait Kiyev rejimi üçün daha da pisləşir. Bu şəxs məsuliyyət hissi nümayiş etdirmək iqtidarında deyil və müharibənin davam etdirilməsinə sadiqdir. Onun üçün sülh siyasi ölüm deməkdir", – deyə Zaxarova əlavə edib.

Rusiya XİN sözçüsü Moskvanın Ukrayna ilə bağlı mövqeyinin dəyişmədiyini vurğulayıb və Rusiyanın Ukraynada demilitarizasiya və denasifikasiya siyasətini həyata keçirmək niyyətində olduğunu bir daha bəyan edib.

"Biz əvvəllər də qeyd etdiyimiz kimi, ədalətli və davamlı sülh yalnız Ukrayna böhranının əsas səbəbləri tam aradan qaldırıldıqda mümkündür. Bu, Ukraynanın demilitarizasiyası və denasifikasiyası, həmçinin mövcud reallıqların tanınması ilə əlaqəlidir. Kiyev və bəzi Avropa paytaxtları bunu nə qədər tez anlasa, Ukrayna böhranının sülh yolu ilə həlli bir o qədər tez mümkün olacaq", – deyə Zaxarova bildirib.

Bu açıqlama, Tramp və Zelenski arasında Ağ Evdə baş verən mübahisə və Ukraynaya Qərbin dəstəyinin gələcək taleyi ilə bağlı qeyri-müəyyənlik fonunda səsləndirilib. Rusiya isə öz mövqeyini qoruyaraq Ukraynanın şərtləri qəbul etməli olduğu barədə mesajlar verməyə davam edir.