Tbilisi Beynəlxalq Hava Limanında təhlükəsizlik tədbirləri başa çatıb - SON VƏZİYYƏT AÇIQLANDI

Tbilisi Beynəlxalq Hava Limanında təhlükəsizlik protokoluna uyğun tədbirlər başa çatıb və sərnişinlər hava limanı binasına yenidən daxil olublar.

InterPress.ge xəbər verir ki, hava limanının rəsmi açıqlamasına görə, uçuş və enişlər adi rejimdə davam edir.

"Həm gəliş, həm də gediş reysləri adi qaydada yerinə yetirilir. Hadisə ilə bağlı Gürcüstan Daxili İşlər Nazirliyi araşdırmaya başlayıb", – deyə hava limanının nümayəndələri bildiriblər.

Xatırladaq ki, bu gün hava limanında sərnişinlərin təxliyə edilməsi barədə səsli bildiriş verilib və onlar binadan çıxarılıb. Gürcüstan Dövlət Təhlükəsizlik Xidməti (DTX) hadisənin təhlükəsizlik protokoluna uyğun olaraq həyata keçirildiyini açıqlayıb.