Daxili İşlər Nazirliyi Borjomi meşəsində baş verən yanğınla bağlı məlumat yayıb
Daxili İşlər Nazirliyinin Fövqəladə Halların idarə olunması mərkəzinin yanğınsöndürənləri və xilasediciləri Borjomi vadisində, Axaldaba qəsəbəsi yaxınlığındakı meşədə baş vermiş yanğının lokallaşdırılması işlərini intensiv şəkildə davam etdirirlər. Bu gün səhər saatlarından etibarən yanğının söndürülməsi prosesinə sərhəd polisinin 4 helikopteri cəlb olunub.
InterPress.ge xəbər verir ki, bu barədə Daxili İşlər Nazirliyinin Fövqəladə Hallar İdarəsi Xidməti məlumat yayıb.
Onların məlumatına görə, yanğınsöndürənlər və xilasedicilər tərəfindən gecə boyu lokallaşdırma işləri davam etdirilib. Relyef çətin olduğundan yanğın-xilasetmə texnikasını yanğının mərkəzinə gətirmək mümkün deyil.
“Yanğının söndürülməsi prosesinə Tbilisi, Samtsxe-Cavaxeti və Şida Kartli yanğın-xilasetmə bölmələrindən 150 yanğınsöndürən və Ekologiya və Kənd Təsərrüfatı Nazirliyinin Mühafizə olunan Təbiətlər Agentliyinin Borjom-Xaraqauli Milli Parkının mühafizəçiləri cəlb olunub. Zəruri hallarda digər ərazi idarələrinin mühafizəçiləri müvafiq yanğınsöndürmə vasitələri ilə prosesə cəlb olunacaqlar.
Fövqəladə Halların İdarə Olunması Xidməti tərəfindən xüsusi sahə qərargahı təşkil edilib, buradan meşə yanğınlarının söndürülməsi işləri əlaqələndirilir. Yanğının monitorinqi pilotsuz uçuş aparatları vasitəsilə həyata keçirilir”, - məlumatda deyilir.
