Azərbaycan meymunçiçəyi təhlükəsi ilə əlaqədar sərhəd nəzarətini gücləndirir

Azərbaycan Dövlət Gömrük Komitəsi meymunçiçəyi virusunun yayılmasının qarşısının alınması məqsədilə hava limanlarında və ölkənin digər buraxılış məntəqələrində bir sıra tədbirlər həyata keçirir.

InterPress.ge xəbər verir ki, bu barədə "Report"a Gömrük Komitəsindən məlumat verilib.

Məlumata görə, Ümumdünya Səhiyyə Təşkilatının məlumatlarına əsaslanaraq, meymunçiçəyinə yoluxma riski olan ölkələr müəyyən edilib və onlardan gələn sərnişinlərə xüsusi diqqət yetirilir.

Xüsusilə, yüksək hərarətli sərnişinlərin aşkarlanması üçün hava limanlarında və digər dövlət buraxılış məntəqələrində texniki imkanlardan istifadə edilir. Xəstəlikdə şübhəli bilinən şəxslərin müəyyən edilməsi halında Səhiyyə Nazirliyi, Tibbi Ərazi Bölmələrini İdarəetmə Birliyi və aidiyyəti strukturlarla birlikdə növbəti addımlar müəyyən ediləcək.

Eyni zamanda, ilkin tibbi müayinə və epidemioloji tədqiqatların aparılmasına hazırlıq səviyyəsi yüksəlib.

Məlumat üçün: Azərbaycan hökumətinin direktivinə əsasən, 2020-ci ildə COVID-19 pandemiyası ilə əlaqədar ölkənin quru sərhədləri, o cümlədən Gürcüstanla sərhədləri bağlanıb. Tətbiq olunan məhdudiyyətlər bu il oktyabrın 1-dək davam edir. Bu mərhələdə Azərbaycana hava yolu ilə daxil olmaq mümkündür.