Hündürlükdə işləmək qaydaları getdikcə sərtləşir

“Hündürlükdə işləməyin təhlükəsizlik tələblərinə dair texniki reqlamentin təsdiq edilməsi haqqında” qərara dəyişikliklər daxil edilib.

InterPress.ge xəbər verir ki, sənədə əsasən, hündürlükdən yıxılma təhlükəsi olan yerdə qoruyucu barmaqlığın quraşdırılması məcburi olur.

Bundan əlavə, qoruyucu barmaqlıq EN 13374 standartına uyğun yığılmalı, qoruyucu barmaqlığın quraşdırıldığı iş yerində müvafiq sertifikat saxlanılmalıdır.

Dəyişikliklərə əsasən, binada açıq qalan sahələr hər tərəfdən qoruyucu məhəccərlərlə əhatə olunmalıdır. Həmçinin, insan keçidi kimi istifadə edilən açıq yerin yaxınlığındakı rampa və ya maili sahə məhəccərlə əhatə olunmalıdır.

Bundan əlavə, iş yerində yerləşdirilən istənilən taxtabənd EN 12810-1 standartına uyğun olaraq düzgün dizayn edilməlidir. Həmçinin, düzgün saxlanılmalıdır. Müvafiq texniki sənəd taxtabəndin yerləşdirildiyi iş yerində saxlanmalıdır.

Sənəddə qeyd edilib ki, izlənməni təmin etmək üçün iş yerində yerləşdirilən hər hansı bir taxtabənddə onun istismarı haqqında qeydlər olmalıdır. Bundan əlavə, məsul şəxslər olmadan taxtabəndin quraşdırılmasına, dəyişdirilməsinə və sökülməsinə icazə verilmir. Bununla belə, istifadə edilən taxtabənd materialları istifadə etməzdən əvvəl hər dəfə yoxlanılmalıdır.

Sənəddə oxuduğumuz kimi, qadağa/xəbərdaredici nişanlar qismən sökülən və ya yarımçıq taxtabənd yaxınlığında görünən yerlərdə yerləşdirilməlidir. Həmçinin, taxtabəndə gedən yollar müvafiq növ məhəccərlərlə bağlanmalıdır. 

Taxtabəndin yığılması/sökülməsi, dəyişdirilməsi və təmiri yalnız məsul şəxslərin birbaşa iştirakı ilə mümkün olacaq. Taxtabəndin yoxlanılması hesabatı (yazılı) əməyin mühafizəsinə cavabdeh şəxsdə saxlanmalıdır.

Bundan əlavə, süni pilləkənlərdən istifadə qadağan edilir.

Sənəddə oxuduğumuz kimi, 2026-cı il yanvarın 1-dən iş yerində yalnız EN 12810-1 standartına uyğun texniki sənədi olan hündürlükdə iş üçün nəzərdə tutulmuş taxtabənd yerləşdirilməli və istifadə edilməlidir.