Avropa parlamentariləri “Gürcü arzusu”na çağırış edir
Avropa Parlamentinin deputatları “Gürcü arzusu”nu "Rus qanunu" ölkə daxilində daha da dərin parçalanmalara səbəb olmamış və Gürcüstanın Avropa gələcəyinə təhlükə yaratmamışdan əvvəl onu geri götürməyə çağırır.
InterPress.ge xəbər verir ki,bu bəyanatla Avropa Parlamentinin Xarici Əlaqələr Komitəsinin sədri Devid Makallister, Cənubi Qafqazla əlaqələr üzrə nümayəndə heyətinin rəhbəri Marina Kaliurand və Gürcüstan məsələləri üzrə məruzəçi Sven Mikser çıxış ediblər.
"Biz Gürcüstan parlamenti tərəfindən "Xarici agentlər haqqında qanun"un qəbul edilməsindən təəssüflənirik. Biz çox məyus oluruq ki, hakim çoxluq insan haqları təşkilatlarının və beynəlxalq tərəfdaşların, o cümlədən Avropa İttifaqı və ABŞ-ın narahatlığına məhəl qoymur. Gürcüstan hakimiyyəti qanunu daha da güclənmədən geri götürməlidir.
Bu, Gürcüstan daxilində dərin parçalanmaya səbəb olacaq və ölkənin beynəlxalq statusunu və onun Avropa gələcəyini daha çox təhdid edəcək”, - bəyanatda deyilir.
Avropa Parlamentinin deputatları demokratik dəyərləri müdafiə edən və ölkənin Avro-Atlantik gələcəyi üçün nümayişlər keçirən gürcü xalqı ilə həmrəy olduqlarını bildirirlər.
“Tbilisi hökuməti qanuna etiraz edən dinc nümayişçilərə, müxalif siyasətçilərə, qeyri-hökumət təşkilatlarına və müstəqil mediaya qarşı güc tətbiq etməkdən çəkinərək dərhal gərginliyi azaltmalıdır”, - bəyanatda deyilir.
Bəyanatda bildirilir ki, etirazçılara qarşı hər hansı zorakılıq və ya davamlı hədə-qorxu dinc etiraz hüququnun pozulmasıdır və buna görə də qəbuledilməzdir.
“Biz Şuranı və Avropa Komissiyasını Avropa İttifaqı ilə Gürcüstan arasındakı münasibətləri, o cümlədən ölkəyə verdiyimiz siyasi və maliyyə dəstəyini nəzərdən keçirməyə çağırırıq.
Biz Komissiyanı 12 Xarici İşlər Nazirinin artıq təklif etdiyi kimi, Xarici Agentlər Qanununun Gürcüstanın Aİ-yə üzvlük prosesinə necə təsir edəcəyi ilə bağlı dərhal şifahi qiymət verməyə çağırırıq”, - bəyanatda deyilir.
