DİN aksiya ilə bağlı bəyanat yayır

İctimaiyyətə məlum olduğu kimi, aprelin 15-dən etibarən Rustaveli prospektində başlanan aksiyalara paralel olaraq parlamentin yaxınlığında da iştirakçılar müxtəlif ərazilər istiqamətində yürüşlər təşkil edir ki, bu da nəqliyyatın hərəkətinə mane olur.

InterPress.ge xəbər verir ki, bu barədə Daxili İşlər Nazirliyi bəyanat yayıb.

"İnsanların sayı nəzərə alınaraq və təşkilatçılarla razılaşdırılaraq Rustaveli prospekti bağlanıb.
Son zamanlar Rustaveli prospekti və Parlament binası ərazisində keçirilən aksiyalar zamanı yürüşdə iştirak edənlərin sayı xeyli azalıb.

Yürüş iştirakçılarının azlığını nəzərə alaraq, nəqliyyatın hərəkət hissəsini bağlamağa ehtiyac yoxdur, lakin aksiyada olan insanlar uzun müddətdir ki, süni şəkildə nəqliyyatın yolunu kəsirlər.

Yolun süni şəkildə bağlanması nəqliyyatın hərəkətinin pozulmasına gətirib çıxarır, üstəlik, aksiyaya yaxın ərazidə yaşayan və işləyən insanların hüquqlarını pozur, müəssisə və təşkilatların normal fəaliyyətinə mane olur.

Gürcüstanın “Məclislər və nümayişlər haqqında” qanununun 11 və 11-ci (Prima) maddələrinə əsasən, toplantı və ya nümayiş iştirakçılarının sayı tələb etmədikdə, nəqliyyatın hərəkət hissəsinin süni şəkildə bağlanması qadağandır. Həmçinin nəqliyyatın hərəkətinə qəsdən maneələr yaratmaq qadağandır.

Aksiyanın təşkilatçılarını və iştirakçılarını qanunun tələblərinə əməl etməyə çağırırıq. Hər bir qanunsuz hərəkətin ardınca hüquq-mühafizə orqanı tərəfindən müvafiq hüquqi cavab veriləcək.

Həmçinin, mitinq iştirakçılarını insanların sayının az olmasına baxmayaraq, magistral yolları iflic etməyə çağıran şəxslər də müəyyən ediləcək. Hüquq-mühafizə orqanları onlara qarşı müvafiq qanunda nəzərdə tutulmuş tədbirləri görəcəklər"- məlumatda bildirilir.