Dmitri Kuleba: “Mən Putinin ambisiyalarını təkcə Gürcüstan və Moldova ilə məhdudlaşdırmazdım, onun planları daha da irəli gedir”

Vladimir Putinin ambisiyaları təkcə Gürcüstan və Moldova ilə məhdudlaşmır, onun planları daha da irəli gedir.

InterPress.ge xəbər verir ki, bu barədə Ukraynanın xarici işlər naziri Dmitri Kuleba dünyanın 65 ölkəsindən 160-dan çox media nümayəndəsinin iştirakı ilə keçirilən onlayn brifinqdə bildirib.

Kuleba Rusiyanın 2021-ci ilin sonunda yaydığı, Moskvanın NATO-dan 1997-ci il sərhədlərinə qayıtmasını tələb etdiyi sənədi xatırladıb.

“Mən Putinin ambisiyalarını təkcə Gürcüstan və Moldova ilə məhdudlaşdırmazdım. Onun planları daha da irəli gedir və icazə verdikləri qədər də gedəcək.
Buna görə də NATO və Mərkəzi Avropa ölkələrinin öz ərazilərində rus əsgərləri ilə döyüşəcəyi vəziyyətin qarşısını almağın ən təsirli yolu Ukraynaya Rusiyanı bizim ərazimizdə məğlub etməkdə kömək etməkdir”, - Kuleba bildirib.

Onun sözlərinə görə, Putinin Sovet İttifaqını bərpa etmək istədiyini nəzərə alsaq, onun ambisiyaları ən yaxın qonşularının hüdudlarından kənara çıxır.

"O, bir çox dövlətlərin beynəlxalq səviyyədə tanınmış sərhədləri daxilində olmaq hüququnu tanımır, ona görə də Mərkəzi Asiya ölkələri də narahat olmalıdır", - Kuleba bildirib.