İtlər ilə bu yerlərə girmək qadağan olunur - 50 lari cərimə ediləcək

Ev heyvanının erkən və məktəbəqədər tərbiyə və təhsil, ümumtəhsil, ali təhsil və peşə təhsili müəssisələrinin, ərzaq mağazalarının ərazisinə, apteklərə, xəstəxanalara, uşaq və idman meydançalarına, habelə müvafiq qadağan nişanı olan dövlət müəssisəsinin ərazisinə aparılması halında sahibi 50 lari məbləğində cərimə ediləcək.

InterPress.ge xəbər verir ki, bu barədə Gürcüstan parlamentində “Gürcü arzusu” deputatlarının təşəbbüsü ilə hazırlanan “Ev heyvanları haqqında” qanun layihəsində deyilir.

Qanun layihəsinə əsasən, aşağıdakı pozuntulara görə inzibati məsuliyyətin tətbiqi nəzərdə tutulur: - ev heyvanlarını gəzdirmək, səyahət etdirməklə bağlı təhlükəsizlik tələblərini pozmaq halında; ev heyvanının (it, pişik) yetişdirmə tələblərinin pozulmasına görə; ev heyvanlarının idarə edilməsi sahəsində fəaliyyət göstərən subyektlər tərəfindən qanunvericiliklə müəyyən edilmiş tələblərin pozulmasına görə.

Layihəni nəzərə alaraq, bulvar, park və ya meydan da daxil olmaqla, açıq sahədə itin ağızlıq olmadan gəzdirilməsi sahibinin 150 lari məbləğində cərimələnməsi ilə nəticələnəcək, artan risk cinsindən olan bir it üçün - 300 lari məbləğində cərimə tətbiq ediləcək.

Ev heyvanı (it, pişik) ilə yeraltı elektrik nəqliyyatı (metro), kanat yolu, M2 və M3 kateqoriyalı avtobuslarla müntəzəm sərnişin daşımaları və şəhərlərarası müntəzəm sərnişin daşımaları ilə səyahət etdikdə ağızlıq və ya xüsusi daşıyıcı olmadıqda (konteyner, çanta) sahibinə 150 lari miqdarında, artan risk cinsli itə görə isə 300 lari cərimə tətbiq ediləcək.