Andlılar kollegiyası təqsirləndirilən şəxsi məişət zorakılığı və digər cinayətlərdə təqsirli bilib

Zuqdidi Şəhər Məhkəməsində andlılar kollegiyası gender əsaslı məişət zorakılığı, ailə üzvünün azyaşlının iştirakı ilə sistematik şəkildə döyülməsi, hədə-qorxu, zorlama, məhkəməyə hörmətsizliklə bağlı işi müzakirə ediblər və bir nəfəri bu iş üzrə təqsirli biliblər.

InterPress.ge xəbər verir ki, bu barədə prokurorluq məlumat yayıb.

Məhkəmənin hökmü ilə təqsirləndirilən şəxs 6 il müddətinə azadlıqdan məhrum edilib.

“Məhkəmə zamanı müəyyən edilib ki, təqsirləndirilən şəxs cinsi ayrı-seçkilik zəminində arvadını, o cümlədən azyaşlı uşağın yanında sistemli şəkildə döyüb. O, həmçinin zərərçəkmişə qohumları ilə ünsiyyət qurmağı, onun icazəsi olmadan evdən çıxmağı, mobil telefondan istifadə etməyi, yazışmalara, gələn və gedən zənglərə baxmağı qadağan edib və kişi olduğunu əsas gətirərək ona sorğu-sualsız itaət etməsini tələb edib. Təqsirləndirilən şəxs arvadını hadisə barədə hüquq-mühafizə orqanlarına məlumat verəcəyi təqdirdə sağlamlığına zərər vurmaqla və bədənini şikəst etməklə hədələyib”, - deyə məlumatda bildirilir.

Qurum qeyd edir ki, 2023-cü il oktyabrın 12-də Poti Şəhər Məhkəməsinin iclas zalında təqsirləndirilən şəxs məhkəməyə verilmiş birinci təqdimata və həbs-qətimkan tədbirinin tətbiqi ilə bağlı vəsatətə baxılarkən məhkəməyə hörmətsizlik  edib və dəfələrlə prokuroru təhqir edib.

“Prosesdə prokurorlar şahidləri təqdim edərək, təqsirləndirilən şəxsin törətdiyi cinayətlə bağlı ekspertiza rəylərini, yazılı sənədləri və videoçəkilişləri araşdırıblar”.

İşi ətraflı araşdırdıqdan sonra andlılar kollegiyası ittiham tərəfinin mövqeyini bölüşüb və onu təqsirli bilib.