Ramilə Əliyeva bir qrup erməni icmasının tələbinə cavab verdi: "Qəti şəkildə bildirirəm ki, istefa verməyəcəm"

İctimai Yayımçının "Rəngarəng Gürcüstan" qrupunun rəhbəri, jurnalist Ramilə Əliyeva bir qrup erməni icmasının  onun Şuşa şəhərinə səfər etməsinə və etnik işarə ilə onu qınamasına cavab verib.

InterPress.ge xəbər verir ki, Əliyeva bununla bağlı Facebook səhifəsində paylaşım edib.

"İndi sizə bir neçə ay əvvəl mənə və əməkdaşlarıma qarşı başlayan etnik terror kampaniyasından danışacağam.
2017-ci ildə İctimai Yayımçıda layihəyə start verdik və mən şəxsən Gürcüstanın etnik azərbaycanlı və erməni gənclərini bir araya topladım, azərbaycanlı və ermənidilli əhalinin maarifləndirilməsi üçün qrup yaratdıq - Gürcüstanda baş verən xəbərləri azərbaycan və erməni dilinə çevirəcəkdilər.
Qonşu ölkələrdə davam edən münaqişə fonunda Gürcüstanda yaşayan azərbaycanlılarla ermənilər arasında müəyyən gərginliyin olduğu heç kimə sirr deyil.
Ona görə də bu gənc jurnalistlərin hər cür kənar təzyiqlərdən, zorakılıqlardan azad olacağı, eyni ölkənin vətəndaşları kimi bir-biri ilə normal işgüzar və mehriban münasibət quracaqları bir məkan yaratmaq mənim və bu ideyanın tərəfdarları üçün çox önəmli idi.
Beləliklə, bir otaqda işləməyə başladıq və bu günə qədər davam edirik.
Onu da qeyd etmək lazımdır ki, azərbaycanlı və erməni gənclərin birgə işləməsi və yaşaması ideyası hər kəs üçün məqbul deyildi və jurnalistlər azərbaycanlılarla və ermənilərlə birgə işləməyə cəsarət etdiklərinə görə hər iki icmanın nümayəndələri tərəfindən çoxlu təzyiqlərə məruz qalıblar.
Bəziləri bu təzyiqə tab gətirə bilməyib, işdən çıxıblar.

Bu gün Gürcüstanın vicdanlı vətəndaşları olan, dünyagörüşü ölkədə və bütövlükdə regionda sülhün bərqərar olmasını nəzərdə tutan insanlar bu komandada qalıblar. Təəssüf ki, regionda vəziyyətin gərginləşməsinə paralel olaraq cəmiyyətin bir qrupu ifrat zorakılıq kampaniyasını təzələyib, buna dözmək mümkün deyil. Adı çəkilən qrup terrorla məşğul olur və etnik zəmində şəxsən məni gözdən salmağa çalışır! Onlar Gürcüstan vətəndaşlarını etnik, dini, mənşəyinə görə seçib, açıq şəkildə aralarında münaqişə salmağa çalışırlar. Onlar bizi birbaşa hədələyirlər ki, etnik ermənilərlə azərbaycanlılar bundan sonra da birgə fəaliyyət göstərməyəcəklər.
Mən bütün cəmiyyətə müraciət edib soruşmaq istərdim ki, bir qrup insanın etnik mənsubiyyətinə görə Gürcüstan vətəndaşlarının seçilməsi və ona hədə-qorxu gəlinməsi ilə məşğul olmaq nə deməkdir?! Bizi kim qoruyacaq?!
Bu qrupun üzvlərinin Facebook səhifələrinə baxın və onların dünyagörüşü aydınlaşacaq.
Bu qrupun üzvlərinə birbaşa deyirəm ki, mən indiyə qədər gördüyüm, inandığım işlərdən əl çəkməyəcəyəm və davam etdirəcəyəm. Çünki onlardan fərqli olaraq Gürcüstan mənim vətənimdir, mən Gürcüstanı sevirəm! Mən həmvətənlərimi, iş yoldaşlarımı, dostlarımı etnik mənsubiyyətinə, dini mənsubiyyətinə görə bölmürəm və adıçəkilən qüvvələrin cəhd etdiyi Gürcüstanda ermənilərlə azərbaycanlılar arasında münaqişənin baş verməməsi üçün hər şeyi edəcəm. Həmçinin Gürcüstanın Daxili İşlər Nazirliyinə, Gürcüstanın Təhlükəsizlik Xidmətinə, Gürcüstanın Baş Prokurorluğuna müraciət edirəm.
Özümü və əməkdaşlarımı real təhlükə altında hiss etdiyim üçün adıçəkilən təşkilata və onun sədrinə qarşı müvafiq tədbirlərin görülməsini, istintaqın başlanılmasını tələb edirəm. Öz ölkəmizdə etnik mənşəyimizə görə işləməyimiz qadağan edilir və təhdid edilirik.
Bu qrupun tələbinə gəlincə, belə çıxır ki, mən azərbaycanlı olduğum üçün istefa verməliyəm - qəti şəkildə bildirirəm ki, istefa verməyəcəm!
Bəli, mən istefa verməyəcəyəm! Çünki bu səbəbdən istefa verməklə çox sevdiyim ölkəmi, çox hörmət etdiyim ölkəmin qanunlarını, adət-ənənələrini təhqir etmiş olaram.
Məni etnik mənsubiyyətinə görə heç vaxt fərqləndirməyən gürcü, erməni, azərbaycanlı, kürd, abxaz, osetin, udinli və yəhudi dostlarımı təhqir etmiş olaram. Mən heç vaxt kiminsə etnik mənsubiyyətinə görə ayrı-seçkiliyə məruz qaldığını hiss etmədiyim, hətta bir eyhamının belə əlverişsizlik hesab edildiyi İctimai Yayımçını təhqir etmiş olardım.
Beləliklə, mən gördüyüm işi davam etdirəcəyəm və Gürcüstanda etnik münaqişələrin qarşısını almaq üçün hər cür çalışacağam.
Mən etnik azərbaycanlıyam, müsəlmanam, qadınam, Gürcüstan vətəndaşıyam, yaşadıqca belə olacam və heç bir təhlükə məni bundan imtina etməyə məcbur edə bilməz!".

Bu mövzu ilə bağlı Ramilə Əliyevaya Azərbaycanın Gürcüstandakı səfirliyi dəstək olduğunu bildirib:

" Ramilə xanım Əliyeva, Siz tək deyilsiniz! Biz sizinləyik! Sizi dəstəkləyirik!"- deyə səfirliyin məlumatında bildirilib.