Gürcüstanda rekord sayda doluya qarşı torlar quraşdırılıb
2020-ci ilin əvvəlindən təxminən 180 hektar Gürcüstan bağı doluya qarşı torlarla örtülüb.
InterPress.ge EastFruit-ə istinadən xəbər verir ki, son məlumatlara görə, 2023-cü ildə daha 65 hektar doludan qorunma sistemləri ilə təchiz olunub.
Məlumata görə, orta hesabla ildə 45 hektar sahədə doluya qarşı sistemlər quraşdırılıb.
Dolu əleyhinə sistemlərin ümumi dəyərinin 10%-ə qədəri dövlət tərəfindən maliyyələşdirilir, kənd təsərrüfatı statuslu kooperativlərdə, bölücü xəttin yaxınlığında (Rusiya işğalı) və yüksək dağlıq yaşayış məntəqələrində isə ümumi dəyərin 20%-ə qədəri maliyyələşdirilir.
Gürcüstanın Ətraf Mühitin Mühafizəsi və Kənd Təsərrüfatı Nazirliyinin hesabatına əsasən, 2020-2022-ci illərdə proqram çərçivəsində doluya qarşı sistemlərə ümumi investisiya 2,3 milyon dollar təşkil edib.
Ümumilikdə, proqramın icrasına başlanandan, o cümlədən Kənd İnkişaf Agentliyinin təqdim etdiyi hesabata əsasən, süfrə üzümü bağlarında sistem 17 faiz ərazidə quraşdırılıb, qalan hissə alma, gilas və armudun payına düşüb. 2023-cü ildə yeni investisiya (65 hektar) yalnız alma bağlarına qoyulub. Hazırkı məlumatlara görə, alma örtülü və ya yaxın gələcəkdə örtüləcək ümumi ərazinin ən azı 71%-ni tutur.
EastFruit-ə danışan yerli bazar iştirakçıları vurğulayırlar ki, doludan qorunma sistemləri təzə məhsulun həm keyfiyyətinə, həm də kəmiyyətinə diqqət yetirən müəssisələr üçün vacibdir.
Bir çox iri müəssisələr hələ hökumət anti-dolu sistemlərinin quraşdırılması üçün maliyyə stimulları verməyə başlamazdan əvvəl sistemi quraşdırıblar, çünki bu investisiyalar cəmi bir mövsümdə öz bəhrəsini verib.
