Tbilisi meriyası ictimai nəqliyyatda yazılan cərimələrlə bağlı açıqlama verdi

Tbilisi meriyası ictimai nəqliyyatda biletsiz sərnişinlərin 50-60 lari məbləğində cərimələndiyi barədə yayılan məlumatı təkzib edir.

InterPress.ge xəbər verir ki, məlumata görə, ictimai nəqliyyatda biletsiz gediş-gəliş 20 lari məbləğində cərimə olunur.

“Bu gün sosial şəbəkələrdə yayılan, vətəndaşların ictimai nəqliyyatda biletsiz getməsinə görə 50-60 lari məbləğində cərimələnməsi ilə bağlı yayılan məlumatlara cavab vermək istərdik.

Tbilisi meriyasının Nəqliyyat və Şəhərsalma Agentliyi qəti şəkildə bildirir ki, yayılan məlumat yalandır və vətəndaşları çaşdırmaq məqsədi daşıyır.

Bir daha xatırladırıq ki, Gürcüstan İnzibati Xətalar Məcəlləsinin 130-cu maddəsinin 4-cü hissəsinin “a” yarımbəndinə əsasən, biletsiz səyahət etmək, habelə 10-16 yaş arası uşaqların ictimai yerlərdə biletsiz daşınması, 20 lari məbləğində cərimə ilə nəticələnəcək.  Cərimənin könüllü ödənilməsi üçün 30 gün müəyyən edilir.

Bildiririk ki, biletsiz sərnişinin cərimələnməsi qanunla müəyyən edilmiş məcburi tədbirdir və cərimələrdən alınan pullar ictimai nəqliyyatın düzgün fəaliyyət göstərməsinə sərf olunur.

Nəqliyyat və Şəhərsalma Agentliyi vətəndaşları yoxlanılmamış və yalan məlumat yaymaqdan çəkinməyə, zəruri hallarda qurumun 13 98 qaynar xəttinə zəng etməyə çağırır”, -deyə məlumatda qeyd olunub.