Səhiyyə naziri : " Təəssüf ki, itkin düşənlər arasında uşaqlar da var"

Təəssüf ki, itkin düşənlər arasında uşaqlar da var, deyə təbii fəlakət zonasında olan səhiyyə naziri Zurab Azaraşvili bildirib.

InterPress.ge xəbər verir ki, nazirin sözlərinə görə, təbii fəlakət zonasına bir neçə tibbi yardım briqadası səfərbər edilib.

“ Məndə olan məlumatların bir hissəsi təsdiqlənib, lakin hamısı deyil. Təəssüf ki, itkin düşənlər arasında uşaqlar da var. Tibbi yardım baxımından müxtəlif ixtisaslara malik müxtəlif növ briqadalar sahəyə səfərbər olunur.", - nazir bildirib.

Xatırladaq ki, Şovidə avqustun 3-də sürüşmə baş verib və fəlakət nəticəsində ölənlərin sayı 11-ə çatıb. Hazırda təbii fəlakət zonasından 210 nəfər təxliyə edilib.