Geoloq: "Şovi ərazisində geoloji və hidrometeoroloji hadisələr eyni vaxtda baş verib"

"Sizə əminliklə deyə bilərəm ki, indiki mərhələdə analoji miqyasda fəlakət gözlənilmir".

InterPress.ge xəbər verir ki, bu barədə Milli Ətraf Mühit Agentliyinin geoloqu Merab Qaprindaşvili avqustun 3-də Şovidə baş vermiş fəlakətlə bağlı bildirib.

Onun jurnalistlərə verdiyi məlumata görə, fəlakət bir çox təbii amillər nəticəsində inkişaf edib və onun təkrarlanma təhlükəsi yoxdur.

Onun sözlərinə görə, 1991-ci il zəlzələsi istisna olmaqla, Qərbi Gürcüstanda analoji təbiət hadisəsi heç vaxt baş verməyib.

 “Bu il avqustun 3-də günorta saatlarında Oni bələdiyyəsinin Şovi kurortunun ərazisində eyni vaxtda geoloji və hidrometeoroloji hadisələr baş verib. Çayın baş hissəsində intensiv əriyən 2 buzlaq var. Bu, güclü yağışla müşayiət olundu, sahil sürüşmə prosesləri başladı. Bunların hamısı torpaq sürüşməsinə səbəb oldu. 

1991-ci ildə Raça-İmereti ərazisində baş vermiş zəlzələni saymasaq, Qərbi Gürcüstanda oxşar təbii hadisə heç vaxt baş verməyib. Ətraf Mühitin Mühafizəsi və Kənd Təsərrüfatı Nazirliyinin geoloq və hidroloqları ən qısa müddətdə təbii fəlakət bölgəsinə gələrək işə başlayıblar. 6 qrup bu gün də işləyir. Onlar yalnız vizual olaraq deyil, həm də instrumental monitorinq aparırlar. Sizə əminliklə deyə bilərəm ki, indiki mərhələdə oxşar miqyasda fəlakət gözlənilmir.

Vəziyyət stabilləşib, araşdırma aparılır. Fəlakət tamamilə təbii amillərlə bağlıdır. İndiki mərhələdə təkrarlanma təhlükəsi yoxdur”, - deyə Merab Qaprindaşvili bildirib.