Tbilisi meriyası İkinci Dünya Müharibəsi veteranlarına 1000 lari köçürdü

Faşizm üzərində qələbə münasibəti ilə Gürcüstan hökumətinin qərarına əsasən İkinci Dünya Müharibəsi veteranlarına 1000 lari, bu müharibədə həlak olanların ailə üzvlərinə isə 500 lari köçürülüb.

InterPress.ge xəbər verir ki, məlumatı Tbilisi meriyası yayıb.

Tbilisi meriyasının Səhiyyə və Sosial Xidməti “Müharibə veteranlarına yardım” proqramı çərçivəsində Tbilisidə qeydiyyatda olan 86 nəfərə müvafiq məbləği köçürüb.

O cümlədən İkinci Dünya Müharibəsinə iştirak edən 47 veterana 1000 lari, 39 nəfərə isə 500 lari köçürülüb. Tbilisi meriyası Veteranların İşləri üzrə Dövlət Xidmətinin təqdim etdiyi məlumat bazası əsasında pulu benefisiarların şəxsi bank hesabına köçürüb.