Azərbaycan Gürcüstana şüşə butulka ixracına başlayıb
Qapalı səhmdar cəmiyyəti olan Azərbaycanın şüşə istehsalı şirkəti Glassica Gürcüstana şüşə butulka ixracına başlayıb.
InterPress.ge xəbər verir ki, məlumatı “Report” agentliyi yayıb.
Glassica Sumqayıt Kimya Sənaye Parkının rezidentidir və sənaye parkının özü Azərbaycan İqtisadi Zonaların İnkişafı Agentliyinin yurisdiksiyasındadır.
İlkin mərhələdə Gürcüstana 3,5 mindən çox şüşə butulka göndərilib.
Glassica 2020-ci ilin iyul ayında Sumqayıt Kimya Sənaye Parkının rezidenti kimi qeydiyyata alınıb. Qeyd edək ki, şirkət şüşə əridilməsi üçün 125 illik tarixə malik HORN Glass Industries AG şirkətinin alman texnologiyalarından istifadə edir.
Sənaye parkının ərazisində Glassica müxtəlif növ rəngli qablar (şüşə) istehsal edir.
Şirkətin məhsulları daxili satışlarla yanaşı, Made In Azerbaijan brendi ilə Rumıniya, Moldovaya və hazırda Gürcüstana ixrac edilir. Bu ölkələrdə ümumilikdə 250 mindən çox butulka satılıb.
