Mixail Saakaşvilinin azadlığa buraxılması üçün qərargahlar yaradılır
“Milli Hərəkat” partiyasının sədri Levan Xabeişvilinin sözlərinə görə, Mixail Saakaşvilinin azadlığa buraxılması üçün qərargahlar yaradılır.
InterPress.ge xəbər verir ki, bu barədə Levan Xabeişvili “Milli Hərəkat”ın ofisində keçirilen brifinqdə qeyd edib.
Onun bildirdiyinə görə, bu plan həm də partiyanın büdcəsini Mixail Saakaşvilinin azad edilməsinə yönəltməyi nəzərdə tutur.
Onun sözlərinə görə, plan partiyaüstüdür və istənilən şəxs qərargaha daxil ola bilər.
“Komandamızın verdiyi sözə görə, verəcəyimiz ilk qərar Mixail Saakaşvilinin azad edilməsi üçün qərargah yaratmaqdır. Bizim planımız bu qərargahlara maddi-texniki təminat, infrastruktur və hər cür yardım göstərmək, o cümlədən “Milli Hərəkat” büdcəsinin bir hissəsini Mixail Saakaşvilinin azad edilməsinə yönəltməkdir. İctimaiyyət bilir ki, bir namizəd Giorgi Çaladze ilə həftələrlə məsləhətləşmələr aparılıb. Onun komandası olacaq, qərargahın formalaşması və idarə olunmasını o, öz üzərinə götürəcək. “Milli Hərəkat” həm ölkə daxilində, həm də xaricdə Mixail Saakaşvilinin icmasının fəallaşmasına yardım etmək məsuliyyətini öz üzərinə götürür. Bütün bunlar partiyadan yuxarı olacaq və Mixail Saakaşvilinin həyatı kimin üçün önəmlidirsə, o, qərargaha daxil ola biləcək. Mən “Milli Hərəkat”la birlikdə bu qərargaha uğurlar arzulamaq istəyirəm”, - deyə Levan Xabeişvili bildirib.
“Milli Hərəkat”ın üzvü, yuxarıda qeyd olunan planın liderlərindən biri Giorgi Çaladzenin sözlərinə görə, ölkə daxilində və xaricində aksiyalar Mixail Saakaşvili azad edilənə qədər davam edəcək və bu, çox yaxında baş verəcək.
"Şadam ki, bu partiyada danışmaq əvəzinə etmək əsas iş üslubu olacaq. Prezident Saakaşvili məsələsinin mənim üçün nə qədər önəmli olduğunu hamınız yaxşı bilirsiniz. Bu, Levan Xabeişvilinin elan etdiyi plandır. Prezidentin azadlığa buraxılmasında çoxlu adamların əli var. Qərargahın qapıları hər kəsin üzünə açıqdır. Elə ilk gündən başqa partiyalardan olan dostlarımız da bizə kömək edirlər. Yaxın günlərdə ölkə daxilində və xaricində necə işləyəcəyimizlə bağlı təqdimatımız olacaq və bu, Mixail Saakaşvili azadlığa çıxana qədər davam edəcək. Bu, çox tezliklə baş verəcək”, - Giorgi Çaladze bildirib.
