Gürcüstanda yanacağın qiyməti yenidən ucuzlaşa bilər

Milli Rəqabət Agentliyinin sədri İrakli Lekvinadzenin sözlərinə görə, yanacağın qiyməti yenidən ucuzlaşa bilər.

InterPress.ge xəbər verir ki, o, bu barədə “Mtavari”də keçirilən mətbuat konfransında açıqlama verib.

O bildirib ki, agentliyin 5 iri yanacaq idxalçısının ünvanına avqust ayında başladığı araşdırmanın nəticələri fevralda açıqlanacaq.

“Milli Rəqabət Agentliyi 2022-ci ilin avqustunda avtomobil yanacağı bazarının monitorinqini başa çatdırıb. Monitorinq bizə göstərdi ki, məsələni araşdırmağa başlamaq üçün kifayət qədər əsaslar var. Avqust ayında 5 iri satıcıya qarşı araşdırmaya başladıq. İş bazarda mümkün vicdansız davranış və ya mümkün razılaşdırılmış fəaliyyətlə bağlı idi. Monitorinq prosesində gördük ki, Rusiyadan gətirilən yanacaqda ucuzlaşan idxal pərakəndə bazarda düzgün əks olunmayıb, həmçinin, Avropadan gətirilən yanacağa gəldikdə, yanacaq gömrük anbarından rəqabət aparan şirkətlərə təxminən 0,75-1 lari ucuz qiymətə satılırdı. Bütün bunların 5 böyük şirkətin mümkün razılaşdırılmış hərəkəti və ya vicdansız davranışı ilə bağlı olub-olmaması istiqamətində araşdırmamız davam edir. Bu mərhələdə, avqust ayından indiyədək biz bu məsələnin iqtisadi təhlilini praktiki olaraq başa çatdırmışıq, 5 iri şirkət və digər əlaqəli şirkətlərin sorğuları da praktiki olaraq başa çatdırılıb. Fevral ayında yekun və ya aralıq qərarı maraqlı tərəflərə çatdırmağı gözləyirik. Bu araşdırma nəticəsində qanun pozuntusu aşkar edilərsə, şirkətlərin əvvəlki ilin maliyyə dövriyyəsinin 5%-i qədər cərimə nəzərdə tutulur. 

2022-ci ilin mart ayından bu günə kimi bütün növ yanacağın qiymətləri 1 laridən çox endirilib. Bunun üçün əsas müəyyənedici amil beynəlxalq qiymətlər və milli məzənnənin möhkəmlənməsi tendensiyasıdır. Bununla belə, biz hesab edirik ki, qiymətin daha da aşağı salınması mümkündür və gözlənilir”, - Lekvinadze bildirib.