Gürcüstan Ukraynaya yardım göstərəcək

Baş nazirin qərarına əsasən, Ukrayna xalqına humanitar yardım göstərmək üçün generatorlar alınacaq.

InterPress.ge xəbər verir ki, bu barədə hökumət administrasiyası məlumat yayıb.

Hökumət administrasiyasının rəhbəri Revaz Cavelidzenin dediyinə görə, Gürcüstan hökuməti müharibə başlayandan bəri öz imkanları daxilində ukraynalı dostlarını heç vaxt diqqətdən kənarda qoymayıb.

“Bildiyiniz kimi, Gürcüstan hökuməti müharibə başlayandan bəri heç vaxt ukraynalı dostlarımızı, Ukrayna əhalisini diqqətdən kənarda qoymayıb və onlara hər cür kömək etməyə çalışıb. Bunun sübutu odur ki, Gürcüstan bu dövlətə humanitar yardım edən ölkələr arasında birinci yerdə qalır. Dövlətin bu gün də davam etdirdiyi dəstəyi mütləq qeyd etmək istərdim. Hazırda Gürcüstan ərazisində yaşayan 26 min Ukrayna vətəndaşı müvafiq maliyyə dəstəyi ilə yanaşı, təhsil və tibb sahəsində də müvafiq dəstək alır. Hazırda Gürcüstanın müxtəlif məktəblərində 2345 gənc, o cümlədən 1565 nəfər ukrayna dilində təhsil alır. Müxtəlif tibb müəssisələrində 900-dən çox insana tibbi yardım göstərilib. Dekabrın 1-nə olan məlumata görə, dövlət tərəfindən Ukrayna vətəndaşlarına verilən təxmini dəstək 32 milyon lari təşkil edir. Biz bütün təklifləri hərtərəfli öyrənirik və Baş nazirin tapşırığına əsasən, konkret olaraq İqtisadiyyat Nazirliyi vasitəsilə müvafiq satınalma aparılacaq və ukraynalı dostlarımızın istədiyi müvafiq dəstək və texnika göndəriləcək", - deyə o söyləyib.