Parlament soyuq silahla bağlı yeni qanun qəbul etdi
Gürcüstan parlamenti birinci oxunuşda Daxili İşlər Nazirliyinin hazırladığı soyuq silahlarla bağlı qaydaları sərtləşdirən qanun layihələrini dəstəkləyib.
InterPress.ge xəbər verir ki, bu barədə Daxili İşlər Nazirliyi məlumat verib.
Məlumata görə, qanunvericilik dəyişikliyi ilə soyuq silah gəzdirməklə bağlı sanksiyalar sərtləşir. İnzibati Xətalar Məcəlləsinə edilən dəyişikliyə əsasən, soyuq silah gəzdirən şəxs 200 lari deyil, 500 lari məbləğində cərimələnəcək, eyni zamanda soyuq silahın müsadirəsi də sanksiya sayılacaq.
Qanun layihəsinə əsasən, soyuq silahın təkrar gəzdirilməsi şəxsin cinayət məsuliyyətinə cəlb olunması ilə nəticələnəcək. Mövcud qanunvericilik çərçivəsində cinayət məsuliyyəti yalnız həmin cinayətin bir il ərzində üçüncü dəfə törədildiyi halda yaranır.
Bundan başqa, Cinayət Məcəlləsi soyuq silah gəzdirməyə görə cəzanı artırır. O cümlədən, Cinayət Məcəlləsinin 2381-ci maddəsinin birinci hissəsində sanksiya qismində 6 ayadək müddətə azadlıqdan məhrumetmə cəzası deyil, 2 ilədək müddətə azadlıqdan məhrumetmə cəzası nəzərdə tutulub. Həmçinin, məhkum olunmuş şəxsin qanunsuz olaraq soyuq silah gəzdirməsinə görə məsuliyyət sərtləşir - bu halda dörd ilədək müddətə azadlıqdan məhrumetmə cəzası nəzərdə tutulur.
Yuxarıda qeyd olunan dəyişiklik son dövr praktikasının təhlili ilə bağlıdır. O cümlədən, 2022-ci ilin yanvar-sentyabr aylarında qətl, qəsdən adam öldürmə və sağlamlığa xəsarət yetirmə faktlarının əhəmiyyətli bir hissəsində cinayət silahının soyuq silah olduğu müəyyən edilib.
Qeyd edək ki, 2022-ci ilin yanvar-sentyabr aylarında polis soyuq silahla bağlı 3289 inzibati xəta aşkar edib, qanunsuz soyuq silah gəzdirməklə bağlı 417 fakt araşdırılıb.
