Avropa Parlamentinin 12 deputatı Gürcüstan Prezidentinə müraciət edib
Avropa Parlamentinin 12 deputatı Gürcüstan prezidenti Salome Zurabişviliyə müraciət edərək, "Mtavari Arxi"nin baş direktoru Nika Qvaramiyanın əfv olunmasını istəyib.
InterPress..ge xəbər verir ki, bu barədə Avropa Parlamentinin deputatlarının Salome Zurabişviliyə göndərdikləri məktubda deyilir.
Məktubda qeyd edildiyinə görə, Gürcüstan uzun illərdir ki, Avropaya inteqrasiya yolundadır.
"Bu yol asan deyil, lakin gürcü xalqının böyük əksəriyyəti tərəfindən güclü şəkildə dəstəklənir. Bu yaxınlarda Avropa Komissiyasının tövsiyəsi və Avropa Şurasının qərarı ilə Gürcüstan üçün Aİ-yə namizəd statusu almaq perspektivi açıldı. Ukraynanın Avropa Birliyinin əsas götürdüyü dəyərləri müdafiə etmək üçün verdiyi böyük fədakarlıqlara görə Ukrayna, Moldova və Gürcüstana tarixi bir fürsət verildi.
Biz, Avropa Parlamentində Gürcüstanın Avropayönümlü yolunun tərəfdarları əminik ki, belə bir fürsət nəzərdən qaçmamalı və Gürcüstanın Aİ-yə namizəd statusuna yaxınlaşması və Aİ-yə üzvlük danışıqlarının başlanması üçün bütün mümkün səylər göstərilməlidir.
Təəssüf ki, Gürcüstan indiki hakimiyyəti tənqid edən ictimai xadimlərin siyasi motivli təqib və həbsinin mümkün olduğu ölkə kimi geniş qəbul edilir. Siyasi məhbusların mövcudluğu faktı Aİ-yə namizəd ölkənin statusu ilə bir araya sığmır.
Avropa Parlamenti "Mtavari" teleşirkətinin direktoru Nika Qvaramiyanın çirkli pulların yuyulması, rüşvətxorluq və sənədlərin saxtalaşdırılması ilə bağlı şübhəli hökmünü pisləyib. Bu hökm Gürcüstanda geniş şəkildə hazırkı hökuməti tənqid edən səslərin yatırılması kimi qəbul edilib. Lakin noyabrın 2-də Tbilisi Apellyasiya Məhkəməsi hökmü qüvvədə saxlayıb.
Bildiririk ki, bu iş Gürcüstanın məhkəmə sisteminə mövcud inamsızlığı, habelə məhkəmə sisteminin müstəqilliyini və qərəzsizliyini artırmaq zərurətini ortaya qoyur, eyni zamanda media azadlığına mənfi təsir göstərir və qütbləşməni təşviq edir.
Ona görə də mən sizə müraciət edirəm ki, cənab Qvaramiyanı həbsdən azad etmək üçün Prezidentin əfv səlahiyyətindən istifadə etməyi nəzərdən keçirəsiniz. Biz ürəkdən ümid edirik ki, siz Gürcüstanı strateji məqsədə - Avropaya inteqrasiyaya yaxınlaşdırmaqda liderlik edəcəksiniz", - məktubda deyilir.
Məktubu imzalayırlar: Rasa Yukneviciene, Andrius Kubilius, Josas Olekas, Miriam Lexman, Deis Melbarde, Anna Potiga, Bernard Guetta, Andrey Kovacchev, Auşra Maldeikiene, Peter Pollack, Carlo Fidanza və Raphael Glucksman.
