TDU tələbələrinin bir hissəsi etiraz aksiyalarına başlayır
TDU tələbələrinin bir hissəsi oktyabrın 12-dən etirazlara başlayacaqlarını elan edirlər.
InterPress.ge xəbər verir ki, tələbələr Elmi Şuranın rektoru gizli səsvermə yolu ilə seçdiyi üçün rektorun seçilməsi prosedurunun dəyişdirilməsini tələb edirlər.
“May Tələbə Hərəkatı”nın nümayəndəsi Saba Kerkadze bildirib ki, onların tələbi həm də ondan ibarətdir ki, elmi şura dağılsın, tələbə yataqxanaları tikilsin və dövlət tərəfindən tələbələrə mənzil subsidiyası təyin edilsin.
“Tbilisi Dövlət Universitetində aylardır etiraz dalğası var və bu, tələbələri narahat edən müxtəlif sosial problemlərlə bağlı idi. Aylarla tələblərimizdən biri Tbilisi Dövlət Universitetinin rektoru Qiorqi Şarvaşidzenin akademik və elmi məkana münasibəti uyğun olmadığı üçün istefaya getməsi idi. Onun fəaliyyəti tələbələrin sosial problemlərinin həlli ilə bağlı deyildi, ona görə də onun istefasını tələb etdik. Qiorqi Şarvaşidze vəzifəsindən getdi, lakin bu gün Tbilisi Dövlət Universitetinin rektoru vəzifəsi uğrunda böyük mübarizə gedir. Məsələn, dünən Caba Samuşianın səhifəsində təbrik məktubları var idi. Qohumları, yaxınları, ictimaiyyətə tanınan simalar onu rektor təyin olunması münasibətilə təbrik edirdilər. Biz haqlı olaraq düşünə bilərik ki, onun namizədliyi ilə bağlı söhbətlər gedirdi. Bütün bunlar rəsmən təsdiqlənənə qədər biz universitetin muxtariyyətini qorumaq üçün etiraz edirik, çünki bu, fundamental əhəmiyyət kəsb edir. Eyni zamanda biz Elmi Şuranın dağılmasını tələb edirik, çünki rektoru məhz bu orqan seçir. Caba Samuşia hakimiyyətə yaxın namizəd kimi hakimiyyətin Elmi Şuraya təzyiq obyekti ola bilər. TDU-nun muxtariyyətinin məhdudlaşdırılması təhlükəsi var ki, bu da həmişə sual altındadır. Düşünürük ki, bu gün öz muxtariyyətlərini qorumaq, universitetdə və dövlətdə mövcud olan problemləri dilə gətirmək tələbələrin borcudur”, - deyə Saba Kerkadze bildirib.
Onun sözlərinə görə, universitetin rektoru vəzifəsini kimin tutacağı önəmli deyil, əsas odur ki, universitetdə rektor təyinatı ilə bağlı sistemli nasazlıq aradan qaldırılsın.
O, tələbələrin ehtiyaclarından da danışıb və bildirib ki, tələbləri dövlətdən tələbə yataqxanasının tikilməsidir ki, bu da tələbələrin ağır həyatını xeyli yüngülləşdirəcək.
“May Tələbə Hərəkatı” tələbələrin tələbləri yerinə yetirilənə qədər aksiyalar elan edəcəyini bildirib.
