Sürücülərin nəzərinə! Bu cərimələr artırılır

Parlament birinci oxunuşda yol hərəkəti təhlükəsizliyinin təmin edilməsi istiqamətində İnzibati Xətalar Məcəlləsinə ediləcək dəyişikliklərə baxıb və 81 səslə yekdilliklə dəstəkləyib.

InterPress.ge xəbər verir ki, dəyişikliklərin bir hissəsi sürət həddinin aşılmasına görə cərimənin artırılması ilə bağlıdır.

Nəqliyyat vasitəsinin sürücüsünün sürət həddini 40 km/saatdan artıq aşması 150 lari deyil, 300 lari cərimə ilə nəticələnəcək.

Dəyişikliklər səs-küyün tənzimlənməsi məsələsinə də təsir edəcək. Bir tərəfdən, icazə verilən səs-küy səviyyəsi hökumətin qərarı ilə müəyyən edilir. Digər tərəfdən, istismar səs-küyü müəyyən edilmiş normadan artıq olan nəqliyyat vasitəsini idarə etmək 100 lari məbləğində cəriməyə səbəb olacaq və sürücülük vəsiqəsindən 10 bal silinəcək.

Dəyişiklik driftlərin qadağan edilməsinə də aid olacaq. Xüsusilə, qanunvericiliklə müəyyən edilmiş qaydada keçirilən peşəkar idman tədbirində iştirak halları istisna olmaqla, nəqliyyat vasitəsinin qəsdən sürüşdürülməsi, sürüşdürmə ilə dairəvi fırlanması hərəkətləri 300 lari məbləğində cərimə və sürücülük vəsiqəsindən 30 bal azalma ilə nəticələnəcək. Qeyd edilən hüquqpozma nəqliyyat vasitəsinə, yola və ya digər tikiliyə, əmlaka və ya insan orqanizminə yüngül ziyan vurmaqla nəticələnərsə, cərimənin məbləği 500 lari olacaq.

Qanun layihəsi müəyyən edilmiş qaydalar pozulmaqla şüşələrin qaralmasından və sayrışan siqnallardan istifadəyə də şamil ediləcək. O cümlədən, müəyyən edilmiş qayda pozulmaqla şüşələri qaralmış və ya işığın ötürülməsi məhdudlaşdırılmış nəqliyyat vasitəsini idarə etməyə görə 50 lari deyil, 500 lari, müəyyən edilmiş qaydanı pozaraq sayrışan siqnallardan istifadə etməyə görə isə 200 lari əvəzinə 2000 lari cərimə tətbiq ediləcək.