Gürcüstanda yanacağın ucuzlaşması gözlənilir

"Təxminən 10 gün ərzində yanacaq 10-15 tetri ucuzlaşacaq".

InterPress.ge xəbər verir ki, bu barədə Qlobal Ticarət Qrupunun baş direktoru Vano Mtvralaşvili bildirib.

Mtvralaşvili bildirib ki, yanacağın ucuzlaşması gözləntiləri neftin qiymətinin aşağı düşməsi və larinin məzənnəsinin sabitliyi ilə bağlıdır.

"Yanacağın ucuzlaşacağını gözləməliyik. Neftin qiyməti xeyli aşağı düşüb və bu, larinin sabit məzənnəsi ilə müşayiət olunur. Bundan başqa, dizel və benzinin topdansatış qiymətləri də aşağı düşüb və bu, həm də qiymətlərin tənzimlənməsinə töhvə verir. Məsələn, bu gün topdansatış bazarında 1 litr benzinin qiyməti təxminən 2,70 lari, dizelin 1 litri isə 3,30 laridir. Bütün bunların nəticəsidir ki, bu ay yanacaq artıq 10-20 tetri ucuzlaşıb və hazırkı beynəlxalq neft qiymətləri şəraitində yaxın 10 gündə yanacaq əlavə 10-15 tetri ucuzlaşacaq”, - Vano Mtvralaşvili deyib.