“Sarp” və “Tbilisi Hava Limanı”nda bəyan edilməmiş pul aşkarlanıb

“Sarp” və “Tbilisi Hava Limanı” gömrük-keçid məntəqələrində Maliyyə Nazirliyinin Gəlirlər Xidmətinin gömrükçüləri şübhə əsasında Gürcüstan və Türkiyə vətəndaşlarına həm fiziki, həm də çantalarına ətraflı yoxlama aparıblar, nəticədə bəyan edilməmiş 80.750 avro, 110.000 ABŞ dolları və 12.600 Türk lirəsi aşkar edilib.

InterPress.ge xəbər verir ki, bu barədə Maliyyə Nazirliyinin Gəlirlər Xidmətindən məlumat verilib.

Məlumata görə, bəyan edilməmiş pul vəsaitlərinin ümumi məbləği Milli Bankın məzənnəsinə əsasən, 546 875,7 lari təşkil edib.

Gürcüstan Gömrük Məcəlləsinin 169-cu maddəsinin 3-cü hissəsinə uyğun olaraq qanunu pozan vətəndaşlar sanksiya qismində ümumilikdə 54 687,57 lari (məbləğin 10%-i) məbləğində cərimələnib.