"Gürcüstandakı rəsmilər öz tonunu dəyişməlidirlər və əgər hansısa səbəblərdən bunu edə bilmirlərsə, Ukrayna ilə bağlı ictimai çıxışlarını azaltsınlar" - Podolyak
"Gürcüstandakı rəsmilər öz tonunu dəyişməlidirlər və əgər hansısa səbəblərdən bunu edə bilmirlərsə, Ukrayna ilə bağlı ictimai çıxışlarını azaltsınlar - Bu, onların reputasiyası üçün yaxşı olacaq".
InterPress.ge xəbər verir ki, bu barədə Ukrayna prezidentinin administrasiyası rəhbərinin müşaviri Mixaylo Podolyak “Mtavari Arxi”yə müsahibəsində bildirib.
Onun sözlərinə görə, Ukraynada davam edən soyqırıma haqq qazandıran subyektlərin özləri beynəlxalq ictimaiyyət tərəfindən mühakimə olunacaqlar.
“Şəxsən mən, prezident Zelenski və Davit Araxamiya gürcü xalqının Ukraynanın yanında olduğunu çox gözəl başa düşürük. Bu xalq Ukraynada davam edən müharibənin mahiyyətini yaxşı anlayır. Bu insanlar azadlıq və demokratiya dəyərlərini bölüşürlər və Rusiyanın köhnə texnologiyalarına qəti şəkildə qarşıdırlar.
Ukraynada nə baş verdiyini hamı bilir. Ukraynada dinc sakinlər öldürülərkən heç kim bizi tənqid edə bilməz və heç kim deyə bilməz ki, biz nəyisə başa düşmürük. Gürcüstanda vəzifəli şəxslər öz tonunu dəyişməlidirlər, əgər nədənsə bunu edə bilmirlərsə, o zaman Ukrayna ilə bağlı ictimai çıxışlarını azaltsınlar - bu, onların reputasiyası üçün yaxşı olar. Ukraynada davam edən soyqırıma haqq qazandıran subyektlərin özləri beynəlxalq ictimaiyyət tərəfindən mühakimə olunacaqlar. Arzuolunandır ki, bu insanlar öz reputasiyaları və gələcəkləri haqqında düşünsünlər və beynəlxalq ictimaiyyətdən kənarda qalmasınlar”, - Podolyak deyib.
Bundan əlavə, o, keçmiş baş nazir Bidzina İvanişvili haqqında danışıb və qeyd edib ki, Bidzina İvanişviliyə qarşı sanksiyalar tətbiq etmək lazımdır və o, bunun fərdi sanksiyalar olacağına əmindir.
"İnsan pul qazana bilər, ancaq pulunuzun insanların öldürülməsini maliyyələşdirmək üçün istifadə oluna biləcəyini anlayanda bunun üçün müəyyən bədəl ödəməli olacaqsınız. Təbii ki, həm Gürcüstanda, həm də Ukraynada zənginlər dalğası var idi. Biz onlara oliqarx deyirik. Onların çoxlu pulu var. Onlar partiyaları satın alır, parlamentdəki mandatları zəbt edir, siyasi proseslərə təsir göstərirlər. Ukrayna bunu başa düşdü və buna qarşı çıxdı. Biz bu prosesi sona çatdırmağa çalışırıq. Gürcüstan da bu yolla getməlidir. Onlar böyük biznesmen ola bilərlər, amma siyasətə təsir etməməlidirlər. Təəssüf ki, biz bu gün Gürcüstanda bunu görmürük. Deoliqarxizasiya effektiv yoldur və əminəm ki, ölkə bu yolu keçəcək. Rusiyada bir çox insan sanksiyalara görə ağır bədəl ödəyir. Ona görə də Rusiyanın tərəfində olan gürcü oliqarxlarının müvafiq bədəl ödəməsi arzuolunan olardı”, - Podolyak bildirib.
