Gürcüstan Prezidenti: "Eyni namizədin MSK sədri vəzifəsinə təqdim edilməsi və onun cəmi 6 ay müddətinə seçilməsi MSK-nın güclənməsinə töhfə vermir"
Prezidentin MSK-nın hazırkı sədrini parlamentə təqdim etməməsi onunla bağlıdır ki, onun namizədliyi artıq iki dəfə parlament üzvlərinin 2/3 səs çoxluğunu toplaya bilməyib.
InterPress.ge xəbər verir ki, bu barədə
Gürcüstan prezidentinin administrasiyası qeyd edir.
Prezidentin qiymətləndirməsinə görə, eyni namizədlərin MSK sədri vəzifəsinə təqdim edilməsi və onun cəmi 6 ay müddətinə seçilməsi bu mühüm dövlət qurumu olan MSK-nın güclənməsinə töhfə vermir.
“2022-ci il avqustun 5-də Gürcüstan Prezidentinin MSK sədri və MSK üzvü vəzifələrinə namizədliklərini parlamentə təqdim etməsi ilə bağlı həm çoxluq, həm də müxalifət tərəfindən verilən şərhlər və əsassız nəticələr xalqı çaşdırmaq cəhdindən başqa bir şey deyil. Bu isə ictimai və siyasi qütbləşməni daha da dərinləşdirir.
MSK sədri vəzifəsini icra edən Qiorqi Kalandarişvilinin namizədliyinin parlamentə təqdim edilməməsi prezidentin cənab Qiorqi Kalandarişvilinin peşəkarlığına, onun təcrübəsinə və fəaliyyətinə yersiz qiymət verməsini qəti şəkildə istisna edir.
İctimaiyyətə məlum olduğu kimi, prezident iki dəfə MSK sədri vəzifəsinə Qiorqi Kalandarişvilinin namizədliyini parlamentə təqdim edib. Lakin onun namizədliyi hər iki dəfə lazımi səs toplaya bilmədi, nəticədə o, hər iki dəfədə yalnız 6 ay müddətinə seçildi.
MSK sədri vəzifəsini müvəqqəti icra edən və səlahiyyətlərini icra edən üzvlərin parlamentə namizədliyinin irəli sürülməməsi onunla bağlıdır ki, onların namizədliyi iki dəfə parlamentə seçilmək üçün tələb olunan deputatların 2/3-nin səs çoxluğunu qazana bilməyib.
Daim eyni namizədlərin MSK sədri və üzvü kimi təqdim edilməsi və onların yalnız 6 ay müddətinə seçilməsi bu son dərəcə mühüm dövlət qurumu olan MSK-nın güclənməsinə, demokratik inkişafa heç bir töhfə vermir.
Prezident avqustun 5-də MSK-nın sədri və üzvü seçilmək üçün müvafiq müsabiqə komissiyası tərəfindən seçilmiş namizədləri Parlamentə təqdim edib. Komissiya namizədləri seçməklə onların peşəkarlığını və ixtisasını təsdiqləyib. Müvafiq olaraq, onların seçki prosesində iştirak etməmələrinə işarə edən bəyanatlar namizədlərə qarşı hörmətsizliyin ifadəsidir.
Prezidentin bu qərarı prosesə yeni mütəxəssislərin cəlb edilməsinə, MSK-nın demokratik və institusional cəhətdən gücləndirilməsinə, bu mühüm vəzifəyə seçilmək üçün geniş siyasi konsensusa və yüksək legitimliyə malik namizədlərin müəyyənləşdirilməsinə yönəlib. MSK-nın institusional gücləndirilməsi və bu istiqamətdə seçki qanunvericiliyinin təkmilləşdirilməsi Avropa İttifaqının tövsiyələrində də nəzərdə tutulub ki, onların yerinə yetirilməsi Avropa İttifaqı üzvlüyünə namizəd statusunun əldə edilməsi üçün zəruridir”, - deyə Prezident administrasiyasının yaydığı məlumatda deyilir.
Məlumat üçün bildirək ki, MSK sədri vəzifəsini icra edən Qiorqi Kalandarişvili prezidentin parlamentə təqdim etdiyi namizədlər arasında olmayıb. Prezident MSK sədri vəzifəsinə Tamar Alpaidze və Revaz Eqadzenin namizədliyini Gürcüstan parlamentinə təqdim edib.
