Baş nazir Amerika xalqını təbrik edir

"Biz strateji tərəfdaşımız olan Amerika Birləşmiş Ştatlarını və dost Amerika xalqını müstəqilliyin 246-cı ildönümü münasibətilə ürəkdən təbrik edirik".

InterPress.ge xəbər verir ki, bu, Gürcüstanın Baş naziri İrakli Ğaribaşvilinin bəyanatında qeyd olunub.

Baş nazirin qeyd etdiyinə görə, 4 iyul təkcə Amerika xalqı üçün deyil, həm də bütün demokratik dünya üçün azadlığın, demokratiyanın, ümumi dəyərlərimizə sadiqliyin simvoludur.

“Gürcüstanın ən yaxın tarixi həm də azadlıq, müstəqillik, bizim Avropa seçimimiz uğrunda mübarizə tarixidir.  Bu yolda, xüsusən də Gürcüstanın müstəqilliyinin bərpa olunduğu gündən biz həmişə sadiq dostumuz və tərəfdaşımız olan Amerika Birləşmiş Ştatlarının güclü dəstəyini hiss etmişik.

30 illik diplomatik münasibətlər ərzində biz ABŞ ilə demək olar ki, bütün sahələrdə və bütün istiqamətlərdə tərəfdaşlığımızı dərinləşdirmişik.

Amerika Birləşmiş Ştatlarının sarsılmaz dəstəyi ölkəmizin suverenliyinin və ərazi bütövlüyünün qorunması, Gürcüstanın Avropa və Avroatlantik məkana inteqrasiyası, ölkədə demokratiyanın möhkəmləndirilməsi, müdafiə qabiliyyətinin gücləndirilməsi, iqtisadi inkişaf baxımından Gürcüstanı gücləndirir.  Gürcü xalqı bu dəstəyə görə həmişə minnətdar olacaq.

Gürcüstan gələcəkdə də ümumi dəyərlərimizə və güclü tərəfdaşlığımıza sadiq qalacaq.

Amerika Birləşmiş Ştatlarına və dost Amerika xalqına sülh və firavanlıq arzulayırıq. Bu günü Gürcüstan və gürcü xalqı amerikalı dostlarımızla birlikdə qeyd edir!”, - Baş nazirin bəyanatında deyilir.