Gürcüstanın Fransadakı səfiri Xarici İşlər Nazirliyi tərəfindən təzyiqə məruz qaldığını və bu səbəbdən istefa verdiyini açıqladı
Tea Katukia təzyiqlərə görə Gürcüstanın Fransadakı səfiri vəzifəsini tərk etdiyini açıqlayıb.
InterPress.ge xəbər verir ki, bu barədə Tea Katukia sosial şəbəkədə yazıb.
Onun sözlərinə görə, səfir vəzifəsinə təyin olunduğu ilk gündən ona Xarici İşlər Nazirliyi tərəfindən davamlı təzyiqlər olub.
“Bu gün mən Gürcüstanın Fransa Respublikasındakı səfiri vəzifəsini tərk edirəm. Mayın 1-də mən istefa ərizəmi Gürcüstanın xarici işlər nazirinə təqdim etdim və o, bu gün, iyulun 1-də qüvvəyə mindi.
Gürcüstan Prezidenti xanım Salome Zurabişviliyə 2019-cu ildə səfir vəzifəsinə namizədliyimi təqdim etməklə mənə göstərdiyi etimada görə təşəkkür etmək istəyirəm.
Mənim üçün qeyd olunan vəzifə ancaq böyük məsuliyyətlə bağlı idi. Təqdim olunan mandatın yerinə yetirilməsi zamanı məqsədim siyasi qərəzsiz Gürcüstanın maraqlarını maksimum dərəcədə qorumaq, ölkəmizi Fransa və Avropa İttifaqı ilə yaxınlaşdırmaq idi.
Səfir vəzifəsinə təyin olunduğum ilk gündən Xarici İşlər Nazirliyi tərəfindən mənə qarşı davamlı təzyiqlər olub.
Son 25 ilini Fransada keçirdiyimi və Fransa vətəndaşlığına malik olduğumu nəzərə alaraq, bu vəzifəni qəbul edərkən xaricdəki peşəkar yolumun və siyasi qərəzsizliyimin Gürcüstan hökuməti üçün qəbuledilməz olacağını düşünmürdüm.
Elə ilk gündən mən səfirlikdə bir sıra ciddi pozuntuların və struktur nasazlıqlarının şahidi oldum ki, bu da Gürcüstanın Fransadakı nümayəndəliyinin maraqlarına və imicinə ciddi zərbə vurur.
Mən dərindən inanıram ki, yuxarıda qeyd olunan hüquqi dövlət üçün yolverilməz olan hərəkətlər Gürcüstan cəmiyyətinin reallığını əks etdirmir. Cəmiyyətimizin istəkləri azadlıq və ədalət dəyərlərinə, Gürcüstanın hər bir vətəndaşı üçün əsas və bölünməz olan və üzərimizə birlik və məsuliyyət öhdəliyi qoyan dəyərlərə əsaslanır.
Sözügedən vəziyyət, təbii ki, böyük şəxsi səylər bahasına və “Covid-19” pandemiyası ilə əlaqədar fəaliyyətlərin əhəmiyyətli dərəcədə məhdudlaşdırılması şəraitində mənə həvalə edilmiş missiyanı yerinə yetirməyimə mane olmadı. Mandatım müddətində mən Fransada qərar qəbul edənlərlə birlikdə Gürcüstanın Avropa gələcəyini müdafiə etməyə qətiyyətlə davam etdim. Bu gün ölkəmizin tarixinin mühüm mərhələsində olduğunu nəzərə alsaq, sözügedən missiya xüsusi yük oldu.
Bu gün ölkəmizin Avropa gələcəyi və onun demokratik inkişafı yalnız Gürcüstan hakimiyyətinin siyasi seçimindən asılıdır.
Bu gün səfirlikdən getsəm də, yeni peşəkar mərhələdə belə, ölkənin siyasi və demokratik inkişafının qayğısına qalmaqda davam edəcəyəm və Gürcüstanın Avropa İttifaqına doğru irəliləməsi və ümumiyyətlə, Gürcüstanın demokratik, mütərəqqi və tolerant dəyərlərə doğru gedişi dönməz olsun deyə səyimi əsirgəməyəcəyəm", - Tea Katukia deyib.
