Ukraynalı tələbələr Gürcüstan məktəblərinə sadələşdirilmiş qaydada qəbul olunacaqlar

Gürcüstanın təhsil və elm naziri Mixeil Çxenkelinin qərarına əsasən, 2022-ci il fevralın 24-də Ukraynada baş vermiş hərbi əməliyyatlar nəticəsində ümumi təhsillərini Ukrayna məktəblərində davam etdirə bilməyən və Gürcüstanda təhsillərini davam etdirmək arzusunda olan məktəblilər asanlaşdırılmış formada Gürcüstan məktəblərinə qəbul olacaqlar.

InterPress.ge xəbər verir ki, bu barədə Təhsil Nazirliyi məlumat yayır.

“Gürcüstanda təhsilini davam etdirmək istəyənlər istədikləri məktəbə müraciət edə bilərlər.  Gürcüstan, digər ölkələr kimi, Ukraynadan olan tələbələrə dövlət və özəl məktəblərdə həm dövlət, həm də digər dillərdə təhsil almağı təklif edəcək. Qeyd edək ki, mövcud qaydalara əsasən, təhsilini Gürcüstan məktəbində davam etdirmək istəyən əcnəbi vətəndaş öz ölkəsində təhsil almış kimi tanınmaq üçün Gürcüstan Milli Keyfiyyətin İnkişafı Mərkəzinə müraciət etməli və müxtəlif növ sənədlər təqdim etməlidir. Təhsil və elm nazirinin qərarına əsasən, tənzimləmə Ukraynadan gələn tələbələrə şamil edilmir və onlar sadələşdirilmiş qaydada Gürcüstanda təhsillərini davam etdirə biləcəklər. Ətraflı məlumatı Gürcüstanın Təhsil və Elm Nazirliyinin qaynar xəttindən əldə etmək olar: (995 32) 2 200 220”, - məlumatda deyilir.