Siğnağidə qətl törədən şəxs saxlanıldı
Daxili İşlər Nazirliyinin Kaxeti Polis İdarəsinin əməkdaşlarının keçirdikləri əməliyyat-istintaq tədbirləri nəticəsində əvvəllər müxtəlif cinayətlər törətməkdə təqsirli bilinən 1979-cu il təvəllüdlü şəxs saxlanılıb.
lnterPress.ge xəbər verir ki, bu barədə Daxili İşlər Nazirliyi məlumat yayıb.
Nazirlikdən verilən məlumata görə, istintaq müəyyən edib ki, təqsirləndirilən şəxs cari il yanvarın 29-da Siğnaği rayonunun Cuqaani kəndində 1954-cü il təvəllüdlü qadına mübahisə zəminində öz evində xəsarət yetirib. Aldıqları xəsarətlər nəticəsində qadın dünyasını dəyişib.
“Hüquq-mühafizə orqanları tərəfindən həyata keçirilmiş tədbirlər nəticəsində həmin şəxs hadisədən bir neçə saat sonra, axtarış zamanı saxlanılıb.
Faktla bağlı Cinayət Məcəlləsinin qəsdən adam öldürmə 108-ci maddəsi ilə araşdırma aparılır. Cinayət 7 ildən 15 ilədək müddətə azadlıqdan məhrumetməni nəzərdə tutur”, - deyə Daxili İşlər Nazirliyindən bildirilib.
