Ombudsmanın yaratdığı tibb şurası Mixeil Saakaşvilinin vəziyyətini dəyərləndirdi

Ombudsmanın yaratdığı tibb şurası hesab edir ki, Qori hərbi hospitalında olan Gürcüstanın üçüncü prezidenti cəzaçəkmə müəssisəsinə köçürülməməlidir.

InterPress.ge xəbər verir ki, bu barədə bugünkü brifinqdə Tenqiz Tsuladze deyib.

O bildirib ki, buna səbəb Mixeil Saakaşvilinin Qldani həbsxanasının tibb müəssisəsində aldığı posttravmatik stress pozğunluğu olub.

"Çünki insanda posttravmatik stress pozğunluğu var, deməli, bu travmanı, stressi cəzaçəkmə müəssisəsində, xüsusən Qldanidə alıb. Ona görə də biz oraya köçürülməsini o mənada dəstəkləmirik ki, posttravmatik stress pozğunluğu stresssiz bir mühitdə müalicə olunmalıdır", - deyə o söyləyib.

Onun sözlərinə görə, Mixeil Saakaşvilinin vəziyyəti diqqətəlayiq olaraq qalır.

"Nevroloji simptomlardan müəyyən patoloji, balanssızlıq, ümumi zəiflik, açıq anemiya, ağır psixi depressiya və bizim fikrimizcə, post-travmatik stress pozğunluğu davam edir. Xəstənin müalicəsi davam edir və stabildir, bununla belə,  fikirlərimiz var və bunu ətraflı olaraq yazacağıq. Noyabrın 25-də psixoterapiya məsləhət gördük, amma nədənsə həyata keçirilmədi və indi də diqqətimizi ona yönəldirik. Fiziki reabilitasiyaya gəlincə, bu, çox vacibdir. Nevroloji xəstəliklər çox vaxt bir gündə, bir həftədə bitmir və uzunmüddətli reabilitasiya tələb edir", - Tenqiz Tsuladze bildirib.