Gürcüstanda meşədə güclü yanğın baş verib - Helikopter cəlb olundu

Artıq ikinci gündür ki, Ğvarelidə baş verən yanğınla mübarizə aparılır.  

InterPress.ge xəbər verir ki, Çaqurqura dərəsindəki yanğın, ehtimal ki, meşənin alt örtüyünə yayılıb.

Çətin ərazi səbəbindən xüsusi texnika ilə oraya getmək mümkün olmayıb, buna görə səhər saatlarında Daxili İşlər Nazirliyinin Sərhəd Polisi helikopteri yanğınsöndürmə prosesinə cəlb edilib.

Yanğın bölgəsinə yanğınsöndürənlər və meşə xidmətinin əməkdaşları cəlb olunub. İlkin məlumata görə, yanğın 5 hektar ərazini əhatə edir.

Kaxeti Qubernatoru İrakli Şioşvilinin sözlərinə görə, intensiv işlərə və aviasiyanın cəlb olunmasına baxmayaraq, güclü külək və çətin ərazi yanğını söndürməyə mane olur.

“Aviasiya iki saat əvvəl yanğınsöndürmə işlərinə başladı. Ümid edirik ki, helikopterin köməyi ilə bir neçə saat ərzində yanğını lokallaşdırdığımızı elan edəcəyik, ancaq əvvəlcədən proqnoz vermək çətindir. Vəziyyəti meteoroloji vəziyyət də çətinləşdirir.  Canlı qüvvə yanğının episentrində qalır və fəal işləyir", - İrakli Şioşvili bildirib.