SOCAR Gürcüstanda daha bir qəsəbəni qazla təmin etdi - FOTO
"Manqlisinin qazlaşdırılması həqiqətən tarixi bir hadisədir - burada heç vaxt təbii qaz olmayıb və hökumətimizin qazlaşdırma planının bir hissəsi olaraq, düz bir il əvvəl, pandemiyaya baxmayaraq, bu yaşayış məntəqəsinin qazlaşdırılmasına başladıq. Bu olduqca çətin bir layihə idi, baha başa gəldi, amma həqiqətən yaxşı işlər görüldü və təxminən 1600 ailə təbii qazla təmin edildi".
InterPress.ge xəbər verir ki, bunu İqtisadiyyat Naziri Natia Turnava Aşağı Manqlisiyə səfəri zamanı deyib.
Kvemo Kartli Dövlət Nümayəndəsi Şota Rexviaşvili, "Gürcüstan Qaz Nəqliyyat Şirkəti"nin Baş direktoru Mixeil Şalamberidze, SOCAR Energy Georgia-nın Baş direktoru Mahir Məmmədov, SOCAR Georgia Gas-ın direktoru Azər Məmmədov və yerli özünüidarəetmə nümayəndələri qazlaşdırma prosesinin nəticələri ilə tanış olub.
Aşağı Manqlisi əvvəllər qazla təmin olunmayıb. Layihə Gürcüstan Hökumətinin üç illik qazlaşdırma planı çərçivəsində həyata keçirilmişdir. Kurort qəsəbəsinin vahid qaz paylama şəbəkəsinə qoşulması üzrə genişmiqyaslı işlər Gürcüstan hökumətinin 2019-2021-ci illər qazlaşdırma fəaliyyət planı əsasında İqtisadiyyat və Davamlı İnkişaf Nazirliyinin tapşırığı ilə "Gürcüstan Qaz Nəqliyyat Şirkəti" tərəfindən həyata keçirilmişdir.
Genişmiqyaslı işlər başa çatdıqdan sonra Aşağı Manqlisidə yaşayan 1 558 abonentə təbii qazdan istifadə etmək imkanı verildi. Layihənin dəyəri 11 milyon 163 418 GEL olub.
"Bu, turizm obyektlərinin inkişafı və uzun müddət çox yaxşı bir istirahət yeri kimi tanınan Manqlisidə yeni otellərin inşası üçün bir şərtdir, eyni zamanda turizmin inkişafı üçün çox uyğun və cəlbedici bir yerdir. Əlbətdə ki, indi yeni iş yerləri açmaq daha asan olacaq, çünki bu yaşayış məntəqəsinə daha çox investisiya cəlb etdik və bu səbəbdən bütün Manqlisi xalqını bu çox vacib layihənin başa çatması münasibətilə təbrik edirəm", - deyib Natia Turnava.
Bu gün Natia Turnava, sosial cəhətdən həssas olan Lali Kubataşvilinin ailəsini ziyarət edib və burada qaz sobasını yandıraraq qazlaşdırma layihəsinin tamamlandığını simvolik olaraq qeyd edib. Gürcüstan Qaz Nəqliyyat Şirkəti Kubataşvili ailəsinə hədiyyə olaraq qaz sobası təqdim edib.
Hökumət tərəfindən təsdiqlənmiş üç illik genişmiqyaslı qazlaşdırma planı çərçivəsində 2019-2021-ci illərdə Kvemo Kartli bölgəsində 7 870 abonenti əhatə edən ümumilikdə 29 kənd qazlaşdırılacaq.
