Gürcüstana sanksiyalar tətbiq edilə bilər
"Gürcüstanda bütün siyasi aktyorlar zorakılığı açıq şəkildə qınamalı, 5-6 iyul hadisələri araşdırılmalı və günahkarlar qanunun bütün sərtliyi ilə mühakimə olunmalıdır".
InterPress.ge xəbər verir ki, bu barədə Amerika Birləşmiş Ştatlarının dövlət katibinin sözçüsü bəyan edib.
“Əlbətdə ki, ilk növbədə Lekso Laşkaravanın ailəsinə, yaxınlarına və həmkarlarına dərin hüznümüzü bildirir və başsağlığı veririk. Ölüm xəbərini diqqətlə izləyirik. Sülhə və artıq faciəvi şəkildə bir nəfərin, bu halda həmkarınızın həyatını almış zorakılığa son qoymağa çağırırıq. Bütün gürcü jurnalistlərinin təhlükəsizliyi və Gürcüstanda demokratiyanın etibarlılığı, 5-6 iyul tarixlərində dinc nümayişçilərə və jurnalistlərə hücum edənlərin, eyni zamanda zorakılığa təşviq edənlərin şəxsiyyətinin müəyyənləşdirilməsini, saxlanılmasını və qanunun bütün sərtliyi ilə mühakimə olunmasını tələb edir.
Gürcüstan rəhbərlərinə və hüquq-mühafizə orqanlarına hamının konstitusiya hüquqlarını qorumaqla bağlı məsuliyyətlərini xatırladacağıq. Onlara jurnalistləri və media azadlığını qorumaqla bağlı məsuliyyətlərini xatırladacağıq. Hakimiyyət də daxil olmaqla bütün gürcüləri demokratiyada yeri olmayan bu cür zorakılıqları açıq şəkildə qınamağa çağırırıq. Dünyada LGBTQ cəmiyyətini şiddət, cinayət, ayrıseçkilik və damğadan qorumaqdan qürur duyuruq. Biz LGBT hərəkatlarını və insanlarını gücləndirməyə çalışırıq, LGBT qruplarına qarşı şiddətə qətiliklə qarşıyıq və əlbəttə ki, bu vəziyyətdə də ölən keçmiş həmkarınıza qarşı amansız zorakılığı qınayırıq", - deyib Ned Prays.
Onun sözlərinə görə, dünyada insan haqlarının pozulmasına görə məsuliyyət daşıyan şəxsləri məsuliyyətə cəlb etmək üçün müxtəlif silahlara sahibdirlər və belə silahlardan biri də sanksiyalardır ki, bu barədə də əvvəlcədən danışmırlar.
“Baş nazir və gələcəyinə gəlincə, əlbəttə ki, bu, gürcü xalqının qərarıdır. Dünyada insan haqlarının pozulmasına cavabdeh olanlara cavab vermək üçün müxtəlif vasitələrimiz var. Sanksiyalar bu vasitələrdən biridir. Bildiyiniz kimi, sanksiyaları tətbiq etməyincə əvvəlcədən bu barədə danışmırıq, amma vəziyyəti çox yaxından izləyirik. Bunu edənlərin hamısının məsuliyyət daşıdığını görmək istəyirik. Gürcüstandakı bütün siyasi aktyorlara gəldikdə, biz onları bu zorakılığı qınamağa çağırırıq. Gürcüstan hökumətinə gəldikdə, onları bu işin hərtərəfli araşdırılmasına çağırırıq ki, bu dəhşətli cinayəti törədən şəxslər məhkəmə qarşısında cavab versinlər", - Ned Prays deyib.
