Ğaribaşvili: "Üç ölkə - Azərbaycan, Gürcüstan və Türkiyə bir-birindən asılı, çox yaxın bir əməkdaşlığa, ortaqlığa və ən əsası dostluğa sahib ölkələrdir"
Xalqınızı salamlayıram, media nümayəndələrini salamlayıram - Sizi ziyarət etmək mənim üçün böyük şərəfdir, belə isti qarşılanma üçün sizə səmimi qəlbdən minnətdarlığımı bildirmək istəyirəm".
InterPress.ge xəbər verir ki, Gürcüstanın Baş naziri İrakli Ğaribaşvili bu barədə Türkiyə Prezidenti Rəcəb Tayyib Ərdoğanla birgə mətbuat konfransında bəyan edib.
Baş nazirin sözlərinə görə, Türkiyə Gürcüstan üçün çox vacib bir dost dövlət və strateji tərəfdaşdır.
“Siz haqlı olaraq Türkiyənin uzun illərdir Gürcüstanın bir nömrəli ticarət tərəfdaşı olduğunu qeyd etdiniz və birlikdə Bakı-Tbilisi-Ceyhan, Bakı-Tbilisi-Qars, Tbilisi-Ərzurum kimi mühüm layihələri həyata keçirdik. Çox məhsuldar bir söhbətimiz oldu, praktiki olaraq ölkələrimiz arasındakı əməkdaşlıqla əlaqəli bütün məsələləri nəzərdən keçirdik. Fürsətdən istifadə edərək, ölkəmizin suverenliyini dəstəklədiyinizə görə şəxsən Sizə minnətdarlığımı bildirmək istəyirəm. Onu da qeyd etmək istərdim ki, Türkiyə Gürcüstanın suverenliyini, Gürcüstanın NATO-ya üzv olmaq istəyini hər zaman və hər formatda dəstəkləmişdir. Həmçinin prezidentin səbirsizliklə gözlədiyim Baş Strateji Şuramızın növbəti iclası ilə bağlı dediklərinə də cavab vermək istərdim. Üç ölkə - Azərbaycan, Gürcüstan və Türkiyə bir-birindən asılı, çox yaxın bir əməkdaşlığa, ortaqlığa və ən əsası dostluğa sahib ölkələrdir. İkitərəfli və üçtərəfli formatda birlikdə daha çox layihə həyata keçirmək üçün aramızda çox möhkəm bir zəmin var", - dedi İrakli Ğaribaşvili.
