Noyabrın 15-də Qərbi Gürcüstanda yağıntılı hava şəraiti gözlənilir. Gün ərzində Abxaziya, Acarıstan, Sameqrelo-Zemo Svaneti, İmereti və Quriya bölgələrində yağışın bəzi vaxtlarda güclü olacağı, şimşək və dolu düşəcəyi ehtimal olunur. Dənizdə 4-5 ballıq fırtına gözlənilir.
InterPress.ge xəbər verir ki, bu barədə Ətraf Mühitin Milli Agentliyinin yaydığı məlumatda bildirilib.
Məlumata görə, ölkə ərazisinin əksər hissəsində, o cümlədən paytaxt Tbilisidə qərb istiqamətindən güclü külək əsəcək. Yüksək dağlıq ərazilərdə bəzi yerlərdə çovğun və duman müşahidə oluna bilər.
Gözlənilən güclü yağıntılar Acarıstan-Quriya və Sameqrelo-Zemo Svaneti bölgələrində çaylarda və onların qollarının aşağı axınlarında suyun səviyyəsinin əhəmiyyətli dərəcədə artmasına səbəb ola bilər.
Bundan əlavə, dağətəyi və dağlıq ərazilərdə torpaq sürüşməsi və sel proseslərinin yaranması və aktivləşməsi, şəhər yaşayış məntəqələrinin ayrı-ayrı ərazilərində isə subasma halları mümkündür.
Agentliyin məlumatına əsasən, gözlənilən təhlükənin səviyyəsi orta olaraq qiymətləndirilir.
